Oleh: RAHMA DENI, S.Pd
(Guru SDN 60 Payakumbuh)
“Iyo…..iyo….rang Parik Putuih balapau randah…..” Ijah maniruan sabarih lagu nan amakno acok nyanyian di wakatu sanang, sabarih lagu dari Tiar Ramon kalua dari muluik Ijah nan kagirangan mandapek kandak hati…. Ijah mandapek tangkelek ketek dari enek Mudo. Tangkelek bacat sirah nan balukih bungo dakek tapakno.
“Assalamu’alaikum mak….amak….oh amak…..Ijah alah pulang Mak.” Ijah sambia manjenjeng tangkelek keteknyo dalam asoi putiah.
“Wa’alaikum salam,….eh alah pulang anak amak…..,” jawek amak nan sadang malipek baju di tangah rumah.
“Mak, caliak mak…caliak dek amak,” kato Ijah nan sambia mambukak asoi putiah nan barisi tangkelek ketek nan dibalian nek Mudo tadi. Mak, ancak kan mak…” sorak Ijah sambia mamakaian tangkelek ka kakino, mamuta muta badan jo kakino dakek amak.
“Deh…..Iyo rancak mah … warna sirah pulo lai” kecek amak.
“Iyo mak….tau ndak dek amak…salasai Nek Mudo manjua lado di pasa bawah tadi …enek Mudo maajak Ijah makan katupek Kapau di pasa lambuang, tu ka turun ka pasa banto, lewatlah dek amak ka pasa lereng…nampaklah dek Ijah Ado Enek-enek jua tangkelek, tangekelek no ado bacat ado nan polos sajo, dakek nan bacat adolah tangkelek ketek dek amak, ….Ijah tunjuak lah dek amak tengkelek tu, mancaliak an ka Nek Mudo.
“Iyo….Ijah tangkelek tu?” kecek nek Mudo,” Tu Ijah jawek lah “Iyo nek, Ijah ingin pulo punyo tangkelek ketek, soalno kawan Ijah, Ica namonyo inyo ado pulo, Ijah katuju pulo mah.” kecek Ijah sumangaik ka amak.
“Tu lai Ijah batarimo kasih ka nek Mudo?”. Kecek amak sambia mancaliak tangkelek Ijah.”
“Lai lah mak…..mokasih nek Mudo Ijah nan Ijah cinto” kecek Ijah.
“ Oh…iyo mak…enek yang manjua tangkelek tu raso kenal Ijah ….sia lah enek tu dek amak…” Ijah panasaran, lupo, raso parnah caliak enek tu.
“Oh, enek yang manjua di pasa lereng itu enek Rabai namono, nan tingga di Lungguak Batu, di ateh lapangan bola, kampuang awak, Parik Putuih ko” jawek amak manjawek panasaran Ijah.
“Oh..iyo ingek Ijah mak,” “Kampuang wak Parik Putuih ko kan takenal jo pambuek tanggkelek Jah,” amak mampajaleh ka Ijah.
Ijah siap-siap pai mangaji ka surau…. Ijah pai mangaji ka surau pakai tangkelek ketek sirahno….
“Ijah…elok..elok pakai tangkelek no yo….hati-hati jan bagadang hati bana….yo nak” kato amak.
“Iyo mak….indak mak….Ijah pai ngaji dulu yo mak… Assalamu’alaikum…..” Ijah basalam samo Amak.
Sambia jalan Ijah pun balari-lari ketek sambia mambunyian tangkelekno. Beko Ijah bandingan tangkelek Ijah nan warna sirah ko samo tangkelek Ica nan ndak bacat doh….” kecek Ijah dalam hati sambia bajalan manuju surau.
“Sombong saketek indak apo-apo doh, kan, buliah Ica tau tangkelek Ijah nan paliang rancak!” kecek Ijah dalam hati sambia mampacapek jalanno. Tak… tik… tuk… tak… tik… tuk! Bunyi tangkelek keteknyo makin nyariang tadanga di sapanjang jalan manuju surau.
Sapanjang jalan, Ijah basuo jo kanti-kantino. Tapi, bukanno manyapo jo ramah, Ijah malah bajalan maangkek kapalo tinggi-tinggi sambia manghentakkan kakinyo sakuaik tanago. TUK! TUK! TUK! Supayo sado urang mancaliak ka tangkelek sirahno nan baru jo mangkilek tu.
Sasampaino di halaman surau, alangkah sanangno hati Ijah dek mancaliak Ica sadang duduak di tangga surau sambia maelokkan tali tangkelek polosno.
“Ica! Caliak ko aaa! Tangkelek baru Ijah! Warna sirah, ado gambar bungo no loh! Ndak cando tangkelek Ica nan polos jo kusam tu doh!” oceh Ijah sambia mamuta-muta kakinyo di muko Ica.
Ica hanyo senyum tipih sajo, “Iyo rancak mah, Jah. Tapi jan balari-lari jo tangkelek baru tu, licin tangga surau ko dek hujan tadi siang.” kato Ica mengingek-an Ijah.
“Aman no..! Tangkelek Ijah kan rancak, jadi babeda jo nan lain!” jawek Ijah agak bagadang hati.
Sasudah baraja mangaji, di wakatu anak-anak disuruah maambiak uluak dek ustad, Ijah basumangaik nak memamerkan tangkelek merahno baliak. Dek sadang mangecek-negecek di dalam hati juo, Ijah indak mancaliak jalan. Prak! Sriaggg….Gebur….!
Kaki Ijah tasanduang batu licin di dakek tampek wudhuak! Ijah tapeleset…! Tangkelek sirah kesayanganno talapeh dari kaki, lalu melayang jo… CPLUNG! Tangkelek nan baru dibalian nek Mudo tu hanyuik ka dalam aliran aia wudhuk surau nan dalam nan sadang dareh aiano!
“Aaaa! Tangkelek Ijah! Amak… Tangkelek sirah Ijah hanyuik!” Pakiak Ijah sambia manangih taisak isak di tapi tampek wudhuak. Bajuno basah kuyuik, kakino sakik, dan nan paling mambuek hatino ibo: tangkelek barunyo hilang!
Kanti-kanti Ijah nan lain hanyo tabalalak mancaliak Ijah. Tibo -tibo, Ica ndak ragu-ragu mambukak tangkelek polosno, lalu balari manyusuri aliran aia dareh tu dari ateh pambateh semen.
“Ijah, jan manangih! Ica tolongan maambiskno!” teriak Ica. Jo kayu panjang nan ado di dakek pohon pisang, Ica balari-lari mangaja tangkelek sirah tu sabalum masuak ka dalam gorong-gorong nan jahuah.
SZUK! Ujuang kayu Ica barasil menyangkuik tali tangkelek sirah tu persis barasenti lai sabalum hanyuit hilang ka dalam galian tanah gorong-gorong.
Bahati-hati, Ica maambik tangkelek tu lalu bajalan mandakati Ijah nan sadang taisak manangih di bawah tangga surau.
“Ko aaa tangkelek Ijah… Alhamdulillah indak hanyuik ka dalam gorong-gorong doh. Basah saketek, tapi masih utuh,” kecek Ica sambia tasenyum tuluih dan maagihan tangkelek sirah tu ka Ijah.
Ijah tangangak. Matonyo basah dek aia mata jo raso malu nan amaik sangaik. Rasonyo baru tadi inyo pamer jo mancacek tangkelek polos punyo Ica, tapi tanyato Ica nan paling patamo balari menolong barang kesayangannyo.
“Ica… Ijah… Ijah minta maaf yo,” bisiak Ijah sambia menunduk dalam-dalam. “Tadi Ijah sombong bana, Ijah mancacek tangkelek Ica… Padahal Ica elok bana ka Ijah.”
Ica mampaelokkan baju Ijah sambia tersenyum, “Indak apo-apo doh, Jah. Amak Ica acok mangecek-an, sasamo kawan awak harus saling tolong manolong. Nan penting tangkelek Ijah salamaik, kaki indak apo-apo kan?”
Ijah maangguak lambek-lambek sambia mengusap aia matonyo. Inyo taringek pasan amakno tadi sabalum pai: “Hati-hati, jan bagadang hati bana…” Tanyato nasihat amak sabana-bana tajadi dek inyo talalu sombong jo lalai.
Salasai mangaji di surau, Ijah jo Ica berjalan pulang basamo-samo. Kali ko, Ijah berjalan lambek-lambek di sampiang Ica. Indak ado lai pamer atau sangajo menghentakkan kaki kancang-kancang.
Tak… tik… tuk… tak… tik… tuk…
Bunyi tangkelek sirah Ijah jo tangkelek polos Ica tadanga bariringan rancak di sepanjang jalan kampuang. Ijah tasenyum lapang—inyo paham bahwasanno barang nan rancak indak ado gunonyo kalau mambuek hati jadi sombong, dan kawan nan tuluih jauh labiah baharago dari apo pun juo. (*)
Sumber gambar: Shopee
