Oleh: Rahmiwati, S.Sn (Guru MTsN Kota Solok)
Ni Ros di kampuang tibo-tibo manalepon pagi-pagi. “Ta, urang di kampuang ka duduak-duduak, sagalo calon pangulu nan ka jadi panuka pangulu nan lamo bakumpua di jorong. Untuak mahemat biaya ka diciek an se aleknyo. Awak baa, pangulu awak kan lah patuik lo diganti. Datuak awak pi lah tuo bana, kok umua iyo di tangan Tuhan, awak ndak tau lo sia nan ka dulu tapi liau lah sakik-sakik dan liau lah manyarah pulo mintak di ganti. Baa manuruik Ita?”
Dari rantau Ita manjawek, “yo sia nan nampak dek uni. Rasonyo di kampuang kini ndak ado nan ka mungkin lai do. Maa nan lai gak cadiak lah pai marantau, nan tingga nan dak ka bisa diparambiak se lai nyo ni. Ado nan maikua-ikua jo induak se, ado nan manjua barang jo manggadai sawah se karajonyo, ado nan larek dek baampok jo kalapau se. maa nan ka dipiliah lai ni?”
“Baa ka baa awak harus mamiliah, kok ndak bapangulu awak di kampuang ndak lo nyo anggap awak dek urang do. Kok manga-manga urang, awak ndak nyo bao sato doh. Tu tambah indak ado bana suku awak kecek urang lai, apo lai awak iyo ndak bara lo nan tingga di kampuang lai,” kecek Ni Ros.
“Kan itulah dek uni, rasonyo dek kami nan lah di rantau ko ndak ka paralu bana bapangulu do. Kok baralek, kamatian atau aa nan tajadi insyaallah lai salasai juo dek kami di rantau ko nyo, lai ndak paralu ado pangulu bana do, lai ndak ka kami imbauan bana ka kampuang do. Tapi cubo lah uni tanyo ka dunsanak wak nan lain kok lai ado Nampak dek nyo”, jawek Ita.
“Iyo..dek uni lai taraso lo tapi bagi kami nan tingga di kampuang ko paralu juo tampek manyanda, harato pusako awak nan lai masih ado ko sia nan kamaurus. Kok kahidupan uni pi samo tau selah, dapek pagi abih patangnyo. Jo a uni ka manggarap sawah jo parak awak”, kecek Ni Ros lo baliak.
Manjawek pulo lah si Ta, “Tu sia nampak dek uni, kok anak-anak den di rantau ko ndak ado nan namuah do. Nyo ndak pandai iduik di kampuang do, harato pusako, sia sanak-sanak awak di kampuang ndak lo jaleh dek inyo do. Baa kamaurus anak kamanakan”, kecek nyo.
Kalau dari rantau pulo kamaurus kampuang tu iyo payah, ado bana wakia kadang ndak juo salasai do. Kok da Saf se baa?, inyo lai di kampuang se sajak dulu, ranji awak lai tantu dek inyo, harato pusako awak jaleh lo dek inyo”, kato Ni Ros.
“Itu nan ka indak bana lai dek uni, pangananyo pi iyo ciek ka harato se nyo. Baa ndak ka jaleh dek inyo, inyo nan salamo ko manjua jo manggadai sawah awak. Kini ndak bara tingga lai, inyo lo nan ka diangkek jadi pengulu, tu malapehan kijang ka rimbo awak nah. Baru co kabau dicucuak iduang se awak lai. Jadi pangulu tu nan pokok bana nan harus inyo punyo adolah sipaik nan ampek samo jo sipaik nabi. Nan partamo siddiq aratinyo jujur, ka duo amanah dapat dipercaya, nan ka tigo tabligh menyampaikan jo nan ka ampek fathonah artinyo cerdas. Dari nan ampek ko ndak ciek juo nan ado di da saf tu do,” jawek Ita.
“Tapi kini nyo lai lah agak namuah dimasuak an kabanaran, kok manga-manga urang di kampuang kini dari paruik awak inyo nan pai dek inyo lai pandai lo mangecek”, kecek uni pulo.
Nyo baleh lo dek Ita, ”tantulah iyo nyo pandai mangecek dek uni, urang palapau mah, ota sabalik nagari balapie-lapie. Tapi indak ado dasar, apo nan dapek di kampuang se nyo, mah sakola indak lo tamek do. Baa nyo ka maajari anak kamanakan. Di rantau ado nan S1 jo S2 bagai, lai ndak ka nyo cayahan se mamak dek kamanakan beko, alun lai biaya untuak ka maangkek pangulu tu indak lo sangenek dek uni doh. Kama ka awak cari, bara urang bana dunsanak awak nan agak lai ekonominyo. Ndak bitu do ni, kini awak lipek selah gala ko dulu, isuak kok ado anak kamanakan awak nan mamanuhi syarat-syarat tu kok ndak kasadoe gak tigo gai lai ado dek inyo jadi juolah baru awak etong lo baliak, baa manuruik uni?”
“Iyolah..kok baitu pulo kato kau, den manyarah selah. Kok dek den sorang yo indak lo katakao do”, kecek Ni Ros manutuik talepon. ,(*)
