Tukang Tulih: Irwan Malin Basa (Dosen UIN Batusangkar dan Penggiat Kebudayaan)
Cabe atau lado dalam Bahaso Minang diketahui dek ampia kasadonyo urang Minang. Baa mangko baitu? Urang Minang dari dahulu lah tabiaso makan lado. Urang Minang pado umumnyo palado. Kok indak ado lado, kurang lamak rasonyo makanan atau samba nan dibuek.
Ado babarapo variasi Jo turunan kato lado di Minangkabau. Partamo, lado biaso atau nan disabuik cabe keriting. Kaduo, lado kutu atau nan disabuik rawit. Katigo, lado katiak. Tapi pengertian lado katiak marujuak ka merica hitam. Kaampek, lado mantu. Aratinyo lado nan masak saparo. Sabagian buahnyo masih ijau atau ado nan alah kunuang. Kalimo, lado ijau, aratinyo lado nan masih ijau buahnyo atau alun masak.
Dalam mambuek masakan pun ado kato kato lado nan cukuik banyak dipakai di Minangkabau. Ado kato lado tu dilatak an di muko, adopulo nan di balakang. Umpamonyo, dendeng balado, karupuak lado, samba lado, itiak lado ijau, lado tumbuak, lado tanak, lado panyisik an, dan sebagainyo.
Lado adolah salah satu komoditas utama di Minangkabau. Dimanopun nagari di Minangkabau pasti Ado urang mananam lado. Dimanopun pasa tradisional pasti Ado urang manjua lado. Harago lado itupun naiak turun. Indak bisa Pulo pamarintah maatur harago lado tu.
Maha atau murah harago lado, pasti manjadi ota nan menarik bagi ibuk ibuk maupun bapak bapak. Ibuk ibuk agak tapakiak kalau lado maha. Tapi apak apak nan baparak lado Sadang panen, lamak galaknyo kok lado maha.
Biaya baparak atau baladang lado cukuik maha. Pupuak, racun, plastik mulsa dan upah urang kaladang lah sagalo maha. Lado nan ditanam itupun alun pasti babuah. Bisa sajo layua sabalun babuah. Kalaupun sampai babuah, alun tantu Pulo banyak. Kalaupun babuah agak banyak, harago murah. Lah rugi urang baparak lado.
Jadi, lado Indak bisa dihindarkan dari kehidupan urang Minang. Lado lah manjadi bagian hiduik urang Minang. Makonyo banyak variasi dan turunan kato lado tu di Minangkabau.
Nan jaleh, Jan sampai tabali lado pagi alias takicuah. (*)
Sumber gambar: Bintang Asia. Diakses dari google free access
