Oleh: Devi Rahmawati, S.Pd
(Guru SMPN 2 Lintau Buo Utara, Kab. Tanah Datar)
Bamulo carito di Ranah Minang, ikolah nagoghi di Lintau Buo, banamo nagoghi Rajo Adat, ka iliegh babateh jo Nagoghi Pangian, ka mudiak babateh jo Nagoghi Lubuak Jantan, tompek basilek daulunyo, Nagoghi Buo sabuiktannyo.
Tatkalo di maso itu, adolah padusi di nagoghi tu, tulang pungguang dek ayah jo amak, padusi banamo si Rambulan. Kok dipatuik ditimbang-timbang, tuo olun mudo balobiah. Kok boban iduik jan ditanyo, sadari ketek biaso bansaik, banyak nan batahan daghi pado nan tasampaian.
Nyampang kok iduik di nagoghi ughang, dak ka gamang kok ndak bapiti. Hiduik pandai bamasyarakaik, pantang dek Rambulan ka mamintak, bialah bakojo siang malam, asa lai dapek kondak ati.
Dulu sangkek Rambulan masih ketek, ayah manakiak gotah, amak bakureh ka sawah ughang, uni jo uda poi marantau, adiak lai ado tapi masih ketek pulo. ”Asa lai untuak sakolah apo juo nan bamintak, bialah amak ndak ka balai. Apo kaparoluan sakolah untuak Rambulan, poi lah boli.”
Baitu bonegh ayah maagiah samangek untuak Rambulan.
Nasib elok dek Rambulan, dek lai codiak juo sangkek sakolah, niek hati ndak ka kuliah, tamat SMA ka langsuang bakarojo, kironyo Rambulan dibiayai kuliah dek adiak ayah.
Daghi baghompek baghadiak kakak, soghang Rambulan nan bagolegh sarjana nye. Bangga ayah jo amak, tabangkik batang taghondam. Kini Rambulan lah bakojo, alhamdulillah dapeklah manolong dunsanak nan iduiknyo payah.
Sonjo nan katiko itu, ado nan tasolek di dalam hati Rambulan. Umah taghaso longang karano ayah nan biasonyo masih bisa bagogha jo golak-golak kini tabaghiang di tompek lolok. Raso patah sagalo tulang, lamah sagalo pasondian.
“Mak, biasonyo makan ayah lai lomak, kini ayah apo dek ndak omuah makan mak?” Rambulan manyapo amak nan sadang baporang jo kalotiak minyak goreng di dapu. Ntah lai tadongegh ntah ndak dek amak, Rambulan batanyo lo liak.
“Mak, amak…Badan ayah batambah kuwi, mato ayah batambah cokuang nampak e, dek apo ayah mak?”
Amak manjawek sambiegh mambaliak-baliak’an kantang di kuali, “Powik ayah lai litak nye Rambulan, tapi ghongkuang ayah sakik ndak bisa malulu, ayah kau domom, angek badannyo makonyo mato ayah cokuang dek ndak bisa lolok bapo aghi ko.
Ndak tolok dek Rambulan mancoliak ayah mode iko, bibia Rambulan manggaretek sambiegh mangecek, “Yah, poi baubek lah wak yo yah…” mato ayah mancoliak panjang ka Rambulan, tapi ayah ndak bisa mangecek. Antah apo nan ado di pikiran ayah, bontuak ado boban nan dipikian ayah.
Raso ka jatuah ayiegh mato Rambulan, sambiegh manahan aiegh mato, Rambulan bakato, “Yah, litak powik ayah? Sakik ghongkuang ayah? Ondak minum ayah yah? Mo lah kito ka uma sakik yah, lai ado piti Rambulan nye yah. Jan ayah pikian lo masalah piti lai, baubek wak yo yah.”
Dek lah mandongegh Rambulan mangecek bontuak itu, ayah maongguak ka Rambulan. Ayiegh mato Rambulan mulai balinang, dalam hati Rambulan bakato, “Ayah, agiah mo’o Rambulan yo yah..ndak tau Rambulan caro maubek ayah do, tapaso Rambulan baok ayah ka umah sakik. Ayah harus kuek yo yah…”.
Dek karano untuang lai di badan diri, tigo aghi ayah di rumah sakik lah buliah dek dotor pulang. “Mak, alhamdulillah lai baansu keadaan ayah. Rambulan poi kojo lu mak, tolong kecek’an ka Mentari jan sampai lupo maagiah ubek ayah”, Rambulan bapasan ka amak. Sonang rasonyo hati Rambulan. Baghu samalam ayah pulang daghi uma sakik, dapeklah kaba daghi uma.
“Uni…ongok ayah sosak ni, payah ayah baongok ni”. Tasirok dagha di dado, takojuik Rambulan dek mandongegh ayah mode tu. “Mentari…baok ayah ka uma sakik baliak, beko uni tuwik kasitu yo. Copek yo Tari, ibo wak dek ayah.”
Ghami nampaknyo ughang di uma sakik, tapi longang ghaso hati Rambulan karano muko ayah batambah pucek, suaro ayah ndak kaluegh lai do, lah manyogha jo ayah nampak nyo. Ayiegh saghoguak ndak talulu dek ayah lai do, ghaso gamang badan dighi ko. Ndak nampak tompek bagantuang dek Rambulan lai do.
Cahayo nan salamo ko manoghangi jalan Rambulan, lah padam sakatiko.
“Ayaaah…ayaaah…bukak mato ayah yah. Ndak ado tompek bagantuang dek kami do yah, jan tinggaan kami yaaah…Ayaaaaah…”
Sagodang apopun pokiak Rambulan, badan ayah lah tabujua kaku. Taduduak Rambulan di sampiang ayah, disitu Rambulan tamonuang. Kironyo, satoghang toghangnyo cahayo Rambulan ndak ka bisa mangalahan cahayo palito hati ayah. Kini palito tu lah padam, kolam sagalo pamandangan. Disitu Rambulan tasintak, jikok tau palito tu ka padam sacopek itu, ndak ka padiaan palito tu padam soghang do. (*)
Sumber gambar: Pinterest
