Ditulih dek:
Syafrianto Rajo Mudo, S.Pd, (Guru SD Negeri 21 Payakumbuh)
Paratian untuak anak manjadi cadiak alah manjadi kasadaran satiok urang di nagari ko, bamacam-macam caro nan ditampuah untuak itu, mulai dari balatiah jo kalampok nan indak resmi sampai ka tampek nan diakui sacaro undang-undang untuak baraja, salah satunyo sikolah.
Sairiang jo pakambangan zaman, sikolah indak hanyo sakadar untuak manuntuik sajo, tapi kinilah banyak nan jadi paratian tantang lingkuangannyo. Paratian nan tatuju bana, ka bantuak program sikolah ramah anak. Sikolah ramah anak marupoan kabutuhan nan mandasar, karano iko manyangkuik tantang raso dalam proses baraja di sikolah.
Sikolah ramah anak indak lapeh dari tujuan sacaro basamo untuak mambuek lingkuangan sikola yang tabukak palaksanaannyo, aman dari gangguan, barasiah dari sarok jo gabuak lainnyo, jo paduli dalam mamanuahan hak-hak murik di sikolah.
Yo dapek kito batapuak santiang ateh sikolah ramah anak nan maagiah palayanan kasih jo sayang. Mode nan dipasangan di SD Nagari 21 Payokumbuah, sikolah ramah anak dapek manjadi caro jalan mambantuak laku jo parangai, marangsang patumbuhan anak sarato jo bakambang dalam kadaaan sanang jo raso mamunyoi dalam baraja.
Salain itu di halaman sikolah dibuek tampek yang mandukuang maso bamain-main murik malalui alaik-alaik pamainan lamo di Minang, mode cakbur, dore, simancik, tangkelek, jo nan lain-lainnyo, nan paliang paralu bana tantang itu tu yo tantang sikolah ramah anak nan mampu bisa untuak malinduangan hak-hak saraoto kaamanan murik sabagai pamaga adaiak dalam nagari.
Balakunyo sikolah ramah anak di SD Nagari 21 Payokumbuah mamang arus sasuai jo kabutuahan murik, apo lai takaik jo lingkuangan yo batua-batua lingkuangan nan cegak, cegak sacaro pisik ataupun sacaro batin.
Sikolah ramah anak indak lapeh dari maagiah tampek untuak anak murik bisa basuaro untuak bisa maambiak kaputusan surang nan dapek ditangguangjawaeikkan. Jadi, inti dari sikolah nan palayanannyo kasih jo sayang tu indak sakadar murik manjalankan tugas dan program baraga nan alah ado, tapi anak-anak muriknyo bisa nyo sacaro labiah dalam manggali pamikiran untuak disampaiann sahinggo bisa didangaan sarato diukua jo jangko dalam timbangan kamuliean ati jo pamikiran barupo kamajuan dalam barajo malalui kamampuan mambuek nan baru dalam pakambangan ilimu jo pangatauan.
SD Negeri 21 Payokumbuah dalam maidangan sikolah ramah anak taliek dari langkah nan alah dikarajoan babantuak mambuek kalompok murik nan bisa tahubuang jo guru-gurnyo jo wakia urangtuonyo barupo komite. Malalui wadah ko, bisa dijambatani bak cando silang-basilang kayu ditungku mako ka nyarak sinyalo api. Hal ntun nan dapek taliek patamuan silang pandapek tantang aturan,
Pangambangan pambalajaran tambahan, kaamanan, sarato kanyaman jo kalangkokan alaik-alaik nan mandukuang baraja salamo di sikolah.
Sikolah ramah anak nan paliang manjadi pusek paratiannyo yang arus disalasaikan dalam bantuak kagiatannyo iolah maiduikan jo mangokohkan raso picayo diri murik di tangah galanggang rami untuak manyuarokan nan bana.
Hal lain nan dapek diambiak malalui payalanan kasiah jo sayang malalui sikolah ramah anak nan ko, baikan jo duduak samo randah, tagak samo tinggi, mambasuik dari bumi, duduak basamo balapang-lapang, duduak surang basampik-sampik salamo baraja disikolah mamparatian tantang iduik kabaragaman sarato azas demokrasi. (*)
