Tanah Data, Jurnalminang.Com. News&Web TV. Satiok hari Akaik dan hari libur atau tempo sikola oto dari Padang ka Bukiktinggi pulang pai sangaik rami. Urang rami bahondoh pondoh malapehan panek panek dek karajo. Tapi pajalanan indak lanca karano oto sangaik banyak sahinggo bahendek hendek sapanjang jalan atau macet kicek urang kini.
Sarupo nan nampak dek tukang tulih beritako pado hari Akaik, 30/05/2021 di daerah Pasa Rabaa taruih ka Padang Panjang. Kalau lah tibo hari Akaik atau tempo sikola jalan iko acok bana macet. Mungkin paralu dicarikan jalan kalua dek pamarintah supayo lanca urang pulang pai.
“Acok bana takah iko. Pokok e asa hari libur macet taruih disiko. Tapi baa lai pak, tapaso ditampuah sajo” kicek Mak Malin nan otonyo tahambek pulo disinan sapulang dari baralek di daerah Koto Baru.
Masalah bantuak iko paralu dicarikan jalan kaluanyo. Kok indak, mungkin nantik jalan ko samakin sasak dek oto karano oto jo honda batambah taruih sedangkan jalan indak batambah. Iko adolah jalan nasional tantu “urang” nan di Jakarta tu harus batangguang jawab Pulo. Kok “urang” propinsi tantu lah panek pulo mauruihnyo tapi panyakik tu indak juo baransua.
Sailiran jalan itu, di daerah Koto Baru, Padang Lua, taruih ka Bukiktinggi lah panuah sasak pulo dek oto sapanjang hari. Jarak dari pasa Padang Panjang ka Bukiktinggi nan hanyo kiro kiro 17 kilo tapaso ditampuah labiah dari sajam labiah. Banyak wakatu tabuang deknyo.
Tu Baa lai? Tunggu juo lah janji janji dari “apak apak” tu kok lai ado pitih untuk itu. Kok indak juo dicarikan jalan kalua nyo, saba sajolah dulu. (Tukang tulih: IMB).
