Oleh: Tiska Sari, S.Pd (Guru SDN 07 Guguak Malalo, Batipuh Selatan)
Pukua sambilan malam biasonyo Upiak jo adiak nyo lah takalok. Tapi malam ko nyo ndak namuah disuruah lalok capek. Malam tu hujan labek bana, sajak sanjo indak baranti-ranti. Keyiko dicaliak jarum jam, jarum pendek lah diangko 10, jarum panjang lah di angko 6.
Ndak lamo sasudah itu pamandangan kalam, kiro nyo lampu mati kasadonyo. “Amak…” basorak upiak baduo adiak nyo. “Lalok lah lai nak, bia amak iduikan lilin,” kecek amak ka upiak. “Ndak amuah lalok mato kami do mak, takuik mak,” jawek upiak.
Tambah malam tambah indak amuah mato Upiak dilalokan. Cahayo lilin nan galok-galok tangguang mambuek suasana malam tambah mancakam. Kito kiro pukua satangah 12, tadanga suaro gadang, antah suaro apo tu. Bantuak suaro gamuruah lai lo, tapi indak dari langik do. Upiak jo adiak nyo balari dari arah biliak. “Mak, abak, suaro apo tu?” Abak pun balari kalua rumah. Dituruik dek Upiak jo amak nyo, dicaliak urang banyak nan lah bahamburan balari kian kamari.
“Kini masuak lah kadalam dulu,” kecek abak ka Upiak jo amak nyo. “Bia abak caliak lo manga urang balari bahamburan.” Ndak lamo sudah itu babunyi pangumuman dari musajik, tapi apo nan disampaian indak jaleh do, sayuik-sayuik tadanga karano suaro aia hujan labiah gadang pulo dari suari mik musajik.
Diambiak abak mantel hujan jo senter kapalo, dilakekan abak pulo sapatu tabuang nyo. “Abak kalua dulu yo nak, abak caliak apo nan tajadi, kalian dalam rumah sajo lah, jan kalua ndak!” Kato absknyo. “Iyo yah,” jawek Upiak jo adiaknyo.
Sampai lah pukua 01.00 malam alun namuah mato upiak dilalokan, diambiak nyo salimuik, dielo nyo kabadannyo sambia tamanuang jo mamikian suaro apo tadi tu? Manga urang balarian? Nan dari paruik tadanga pulo suaro…kriuk kriuk, tando paruik lah mamintak makan lo, tapi indak basalero kamakan.
Indak lamo sudah itu tibo lah abak upiak balari dari arah ateh rumah, bahambua pulo lah upiak jo amak nyo kalua. “Apo nan tajadi bak?” Suaro apo tadi tu bak?” Tanyo Upiak batubi-tubi. Sambia tarangah angah abak manjawek “Galodo nak, batu gadang-gadang lah banyak nan turun, kini anak anak nudo lah banyak nan mancaliak ka hulu, lai ndak ado nan parah dari ateh, awak badoa sajo lah mudah-mudahan kampuang awak elok-elok sajo.”
Nagari Malalo adolah kampuang ketek nan talatak di bawah kaki bukik Patah Gigi, dan diateh danau Singkarak. Kok dipikia yo takuik raso nyo mandanga galodo nan alah manimpo kampuang tacinto.
Sambia masuak ka dalam rumah abak nampak babisiak ka amak. “Upiak nan maraso takuik indak nio lalok kadalam kamar do, lalok lah lai nak,” kecek amak. “lalok sajo lah di muko ko basamo-samo, malakik hari pagi ndak bisa awak manga-manga kini do nak.
Pukua 04.15 subuah mulai tadanga urang abang dari musajik, lampu masih mati, musajik mamakai jenset. Kiro kiro 20 minik sudah sumbayang di masajik, tadanga baliak pengumuman, lah tajadi galodo gadang di Ampua, diharapkan masyarakat sado nyo meningkekan kewaspadaan, barang-barang nan baharago jan lupo disalamaikan dulu, dan kampuang awak dalam status tanggap darurat dari Kabupaten.
Mandanga pengumuman tu tibo-tibo Upiak manangih. ‘Manga manangih nak?” Tanyo amak. Mak, upiak takuik, beko awak dianyuikan dek galodo mak. “insyaAllah nak, badoa sajo awak mudah-mudahan kampuag awak dilindungi dek Allah, sambia mananangan hati upiak jo adiaknyo, amak taruih bazikir jo badoa.
Lambek-lambek hari mulai tarang, kami sakaluarga bajalan kalua, nio mancalia apo nan tajadi? Kiro nyo urang lah rami tagak di dakek Ampua mancaliak aia galodo nan tajadi malam tadi. Aia bacampua luluak lah sampai kajalan gadang, lah sampai lutuik urang gadang. Nampak ado nan mambaok barang-barang baharago nyo sambia malewati luluak nan tarandam aia tu.
Tibo lah pak jorong Jo perangkat nagari, sado warga rumah nyo dakek jo aliran batang aia untuk mangungsi ka balai-balai adat. Oto pun lah mulai banyak badatangan, mulai dari BNPB, polisi, sampai Forkopinda. Tenda langsuang ditagakan di muko balai-balai adat.
Muko cameh indak bisa ditutuikan dari warga, tamasuak upiak jo adiaknyo, masih acok batanyo bak lai indak kadianyuikan wak dek galodo?beko tibo wak di dalam danau yah. Pertanyaan nan kalua dari anak kelas 2 SD nan mambuek hati abak pun ibo. Sambia manangan abak upiak mangecek, “pokoknyo upiak jo adiak banyak-banyak badoa yo nak!”
Babarapo lamo lah banyak urang kampuang nan tagak di tapi danau, karano jalan nan samulo masih bisa dilewati oto jo Honda bagai, kini ndak bisa lai. Lah banyak nan putuih. Mandanga itu masyarakat baharok kok bisa manyubarang lewat danau karano hanyo jalan lewat danau lah manjadi pilihan. Abak jo Upiak, amak dan adiaknyo mancaliak pulo ka danau, kok la bisa manyubarang. Indak bara lamo iyo datang kapa dari subarang, manjapuik warga Malalo nan kadiungsikan ka subarang, tapek nyo daerah nagari Batu Taba.
Banyak nan takuik kanaiak kapa, banyak pulo nan nio naiak. “Yah, awak naiak pulo yah?” tanyo upiak. “Upiak takui bak, beko tabanam wak ditangah danau bak.” Tampa pikia panjang abak manjawek, “iyo nak, nan jaleh awak manyubarang dulu, beko diateh kapa ado rompi nak, bia ndak tabanam upiak.” Badoro dan barabuik lah nan naiak ka ateh kapa. Tapaso lah upiak, amak jo adiak manuruik sajo. Sakitar 20 urang lah naiak ka kapa, termasuk upiak dan keluarga.
Perjalanan sakitar sajam baru kasampai ka subarang. Dalam perjalanan dicaliak suok kida, muko balakang, yo aia sajo nan nampak. Sajauah mato mamandang, lamo-lamo indak nampak kampuang halaman lai. Muko Upiak jo adiak nyo nampak serius, antah dek takuik antah menikmati naiak kapa.
Akhirnyo sampai juo di subarang tapek nyo di Nagari Batu Taba. Disitu pak Bupati lah manunggu warga Malalo nan dipindahkan atau diungsikan dari kampuang. Hati antaro sanang jo ibo maninggaan kampuang halaman, tapi labiah gadang raso takuik.
Sasudah kejadian itu kami harus tingga dulu di Batu Taba, sampai lah dinyatokan aman, atau indak ado darurat bencana lai. Tapaso lah kami hiduik apo adonyo. Kadang makan sakali sahari. Samba nan dibuek Indak pulo samarono rasonyo.
Baju Jo sarawa hanyo duo halai sajo. Lalok di tenda. Indak bakasua, tapi lai balapiak. Mandi alun juo sempat lai. “Baiko bana lah nasib jadi pangungsi” bisiak Upiak dalam hati sambia mancaliak ka danau nan aia nyo lah karuah sakaliliang. (*)
Sumber gambar: Lovelyweekly. Diakses dari google free access.
