Oleh: Ezi Oktariani, S.Pd.I
(Guru SDN 06 Tanah Garam, Solok)
Gadih ketek banamo si Nuraida adolah anak partamo dari duo basudaro. Si Nur, baitu urang maimbau. Si Nur mampunyoi surang adiak laki-laki nan baru baumua limo taun. Nan Si Nur kini alah baumua salapan taun, tapeknyo kelas 2 SD.
Si Nur tingga samo amak jo abaknyo nan jauah dari karamaian, indak pulo balistrik. Kok malam ari lah tibo dama lah kakawan tampek bagurau. Kok bak kecek urang kini pai mautan. Si Nur tingga di sarongkok tuo dan talatak di sabuah gurun tapi sawah.
Dibawah sarongkok nantun sawah bajanjang nan kajadi tampek bamain si Nur jo adiaknyo katiko lah pulang sikola. Sawah nan paliang bawah babateh jo batang aia. Di balakang sarongkok nantun ado ladang nan barisi kopi jo gatah nan alah bisa di ambiak.
Sabana sanang si Nur disiko, bia ndak banyak kawan, indak batipi tapi nyo punyo kaluarga nan sangek sayang ka inyo. Satiok pagi sabalum pai sikola si Nur mangawanan abaknyo mandanga radio sambia maminum kopi daun nan taruih ado diateh salayan dapua amaknyo.
Si Nur anak nan rajin, biapun tingga di tampek nan jauah si Nur indak namuah libur sikola. Satiok pagi si Nur diantaan dek abaknyo pai sikola bajalan malalui batang aia, sudah tu mandaki pulo ka parak urang.
Sakali-kali si Nur bajolang di kuduak abaknyo kok taraso alah mulai panek, tapi samangek e untuak sikola indak amuah ilang. Kalau keceknyo nak nio jagi guru jikok lah gadang. Baitulah kainginan si Nur bacarito katiko sadang bajolang jo abaknyo.
“Ooo Nur, indak panek satiok ari barulang ka sikola ko?” kecek abak ka si Nur.
“Indak bak, dak ado gai Inur ka panek do, Inur nio sakola tenggih-tenggih, buliah Inur bisa lo jadi guru saroman buk Upik tu a”.
“Baa kok Inur nio jadi guru?”
“Iyo bak, Inur sanang se mancaliak buk Upik tu, inyo baonda, barumah rancak. Bantuak-bantuaknyo banyak pitih awak kok jadi guru tu bak. Kok Inur lah jadi guru bisuak, abak jo amak Inur bao dari sawah ko, awak tingga di rumah ancak di kota lai bak”.
“Aamiin” hanyo itu nan kalua dari muluik abak Inur.
Mandanga anaknyo mangecek indak tatahan darai tangih abak Inur do. Raso sanang jo ibo bacampua di batinnyo. Sanang mandanga kecek anak nan sangek paratian ka rang gaeknnyo. Ibo indak bisa manyanangan si Nur sarupo kawan-kawanyo nan lain. Tapi untuang si Nur lai sadang bajolang jadi indak tampak kalau abaknyo sadang manangih.
Baitulah Inur satiok hari pai sikola. Jikok lah pulang sikola Inur dijampuik baliak dek abaknyo. Beko mambao balanjo dari lapau dakek sikola untuak inyo jo adiaknyo nan lah mananti di sarongkok sawah. Pulang sikola si Nur bamain di gurun kok dak di sawah sambia manantian hari sanjo.
Kok lah lewaik wakatu Asya si Nur dibao dek amaknyo mandi baranang ka batang aia. Jikok hari lah galok cahayo bulan mulai kalua, sahabih sumbayang magarik jo mangaji Inur baraja jo amaknyo. Walaupun hanyo bamodal cahayo dari dama ketek indak mambuek samangaik si Nur suruik untuak baraja.
Ado ndak ado PR diagiah dek gurunyo nan si Nur tatap baraja. Mancaliak sumangaik si Nur amaknyopun indak pernah mangaluah panek untuk mangawanan Inur baraja walaupun saharian alah karajo di sawah jo ladang.
Indak habih pamainan si Nur jikok di sawahko, pabilo musim kasawah tibo malam hari si Nur turun kasawah jo abak, amak adiaknyo bagai pai manangkok bilalang untuk kasamba hari barisuak. Karano pado musim kasawah bilalang banyak di sawah samo di pamatang-pamatang sawah.
Abak mambao suluah untuk panarang, si Nur, amak jo adiaknyo manangkok bilalang nan lah nampak batabangan mancaliak Inur tibo. Satiok bilalang nan dapek dimasuakan ka boto minum bakeh nan alah dibao dari sarongkok tadi.
Sunguah sanang hati si Nur tingga mautan ko, walaupun jauah dari urang rami, dari barang-barang nan canggih tapi Inur indak pernah maraso kurang ataupun mangaluah. Inyo Bahagia bana punyo Abak, Amak jo adiak nan sangek sayang ka inyo, punyo tampek bamain nan sangaik lueh ndak ado urang nan ka manggaduah.
Nan paliang pantiang dek inyo adolah sumangaik baraja nan tenggih buliah tacapai cito-cito nak manjadi guru sarupo buk Upik gurunyo di sakola. Sasudah tu bisa manyanangan abak jo amaknyo jikok lah gadang isuak.
