Oleh: Rahmiwati, S. Sn. (Guru MTsN Kota Solok)
Katiko Siti baru salasai kadapua, baru sajo kaduduak untuak malapeh panek, tibo-tibo badariang HP nyo. Kironyo Tek Ana dari rantau. “assalamualaikum Siti.. baa kaba kini?, lai sehat-sehat sajo kasadonyo, sadang manga, lai ndak sibuk.?
“Waalaikum salam.. alhamdulillah tek, kami di siko lai sehat-sehat sajo. Ko baru salasai ka dapua. Aa kaba etek, tumben etek manalepon?
“Iyo..ko si Diva ka KKN di kampuang Siti, nagarinyo Koto Baru, nyo KKN di puskesmas Koto Baru tu. Kiro-kiro lai dakek dari tampek tingga Siti tu. Kok lai kan bisa si Diva barulang dari situ.” Sambuang eteknyo.
Kalau Koto Baru jauah juo dari nagari ranah ko mah tek. Kalau jo onda abih juo wakatu 45 minik” jawek Siti.
“Oo jauah juo yo.” Baleh Etek tu baliak.
“Iyo tek..ndak cubo telepon si Edi atau si Minah (adiak Siti). Laki nyo si Edi tu kan urang Koto Baru, kok bisa nyo mancarian tampek tingga. Atau di rumah nyo tu bana dek lai dakek dari pasa, soalnyo puskesmas tu dakek pasa nah. Lai bisa bajalan kasitu..ndak tek..jo onda juonyo.
Tapi kok ndak bana tingga di rumah si Edi tu, mintak tolong se ka inyo mancarian rumah nan dakek dari lokasi buliah urang tau lo, oo itu dunsanak si Edi, jadi urang tu lai gak sagan lo stek..”.
Itu lah tanyo jawek tek Ema jo Siti katiko itu. Sudah tu tek Ema batanyo “baa urang di situ ti..lai elok”?
Sakatiko Siti tatagun, takana wakatu inyo KKN dulu rasonyo ndak pernah amaknyo nan maurus dima nyo ka KKN, dima tingga malah lah di tampek KKN se baru amaknyo tau nyo KKN di nagari Canggu tu, nagari nan masih kampuang bana.
Sangkek itu urang yo penasaran jo anak KKN ko, apo lai nan bujang-bujang. Rami lapau dakek tampek tingga nyo. Apo se kegiatan rami anak mudo bakumpua. Dek pandai bagaua sampai Siti salasai KKN nan hubungan jo urang situ indak kunjuang putuih apolai jo urang punyo rumah, lah bantuak dunsanak sajo.
Kapatang ko katiko ado keluarga urang punyo rumah tu maningga masih nyo agiah tau ka Siti dan Siti datang pai manjanguak, baitu nyo KKN dulu.
Jo bahaso nan biaso sajo Siti manjawek “lai tek..urang situ lai elok.”
Kok ka diceramahi etek ko baa lah, batanyo lai elok urang disitu. Zaman kini urang tagantuang di awak se nyo, apo lai urang lah sibuk masiang-masiang. Ndak ka nyo urus bagai urusan urang do, malahan kok ado program bana nan ka nyo buek dek anak KKN tu, lun tantu lo urang ka tibo lai.
Urang sibuk jo HP, bisnis surang-surang, jadi sia awak nan ka nyo urus bana dek urang. Pandai awak lah lai mambuek pendekatan ka urang.
Pasanan ka anak tu, elok-elok di nagari urang, sapo urang jo bahaso nan santun, bapandai-pandai awak, jan sombong mantang-mantang awak dari kota, co aa banalah ka rancak awak, lai ka bantuak artis tapi kan ndak artis do. Urang acuah sajo nyo.
Kini urang kampuang, urang kota lah samo se individu nyo sajak ba HP ko, kawan di HP banyak dari pado kawan di dunia nyato, malah bisa lo di kontak. Jadi awak nan harus bapandai-pandai. Ndak urang lo di tanyo lai elok atau indak.
Baitulah sayang induak kini ka anaknyo, kadang ndak di tampeknyo do, bakalabiahan. Lah kuliah anak tantu nyo lah gadang, kok elok tau buruak urang di sinan itu lah nan harus nyo hadapi, baa caronyo menyesuaikan diri jo masyarakat.
Kok elok se urang nan basuo dek inyo tantu ndak ka baraja nyo ma adok-i masalah do. Baa ndak ka kanai mental anak-anak kini di tampek karajo. Baru ka bakarajo lah baper, istilah anak kini eh..bawa perasaan. Ngamuak-ngamuak di medsos, jo urang tu bana ndak talok ngecek do..ndak lamo sudah tu baranti se karajo lai.
Samantaro mancari karajo kini payah. Dikritik urang saketek manangih, ngadu ka amak, urang maota galak-galak awak lah maraso se. Nan amak di rumah mode itu lo, bapakawan anak, yo sombong-sombong urang kini, ndak dima-dima do, anak awak mantang-mantang urang baru nyo pancia an. Ndak nyo rangkul, ndak nyo ajak karajo samo do.
Sahinggo amak nyo lah sato lo baper. Maota kinyak kanin anak den nyo pancia an dek urang di tampek karajo. Urang nan mandanga tantu babagai pandapeknyo. Di muko awak iyo inyo bamanih-manih mambela awak, di balakang lun tantu lai. Kadang awak nyo gunjiangan lo ka urang lain ndak pandai maaja anak. Awak sia nan ka nyo sambut, nan ka nyo rangkul dek urang bantuak di nagari dongeng.
Akhia nyo tek Ema manutuik talepon, “yo lah Siti, bilo-bilo nyo suak etek talepon si Edi.
“Yo tek..” kecek Siti sambia manjawek salam manutuik talrpon.
