Oleh TENSISWARNI,S.Pd.I
(Guru SDN 09 PPA. Kota Solok)
Munin Pono masuak ka dalam pondoknyo nyo. Dak lamo kamudian, inyo kalua dari dalam rumah mambaok balango dari tanah liek. Di dalamnyo ado minyak goriang.
Inyo latakkan balango di ateh meja kayu.
“Tuan lai tau, kami jauah tingga dari pasa,” kato Munin Pono. “Di Kampuang idak sorang juo nan punyo timbangan basi ko do.”
Rajo Basa mancaliek jo raso bangih jo amarah nan dak bisa ditahan.
“Sudah tuu?”
“Setiok bulan, Jaimah mambali minyak dari kadai Tuan. Kami taruih mambali sakilo.”
Jaimah mausok aie matonyo jo ujuang salendangnyo.
“Bana, Tuan. Minyak tu kami gunokan untuak mamasak jo mengoles cetakan supayo gulo idak malakek.”
Munin Pono manaruihkan kato-katonyo, “Karano kami idak punyo anak timbangan, minyak sakilo dari kadai Tuan itulah nan kami jadikan patokan.”
Karumunan mulai haniang.
Hanyo suaro api tungku nan tadanga.
Munin Pono sagolong gulo nan baru mangareh. Inyo malatakkan minyak goriang nan dibalinyo di kadai Rajo Basa pado satu sisi timbangan sederhana. Di sisi lainnyo, inyo malatakkan gulo.
Keduo sisi itu saimbang.
“Satiok kali mambuek gulo, kami manyamokan bareknyo jo minyak sakilo nan Tuan jua kapado kami,” kato Munin Pono. “Kami idak pernah mangurangi ataupun menambahnyo.”
Rajo Basa mancaliek timbangan tu.
Untuak sasaat, inyo idak bisa mamahami kato Munin Pono.
Kamudian wajahnyo balahan barubah.
“Jadi… kalian manimbang gulo manggunokan minyak nan kalian bali dari den?”
“Bana, Tuan.”
“Dan minyak tu manuruik kalian sabarek sa kilo?”
“Baitulah nan tatulih nan Tuan katokan setiok kali manjuanyo.”
Rajo Basa maraso tanah di bawah kakinyo bak raso dioyak gampo.
Inyo ambiek balango nan barisi minyak dilatakkan lah dalam timbangan.
Jarum timbangan bagarak.
Sadonyo mato tatuju ka timbangan gulo tabu.
Jarum tu baranti tapek pado angko sambilan ratuh gram.
Idak ado tadanga suaro, sabana haniang katiko tu.
Angin nan barambuh dari ladang manggarikkan daun-daun tabu. Desirannyo tadanga bantuak bunyi urang manyorakkan kabanaran.
Sssrrr… sssrrr….
Rono Rajo Basa nan samulo sirah kini barubah pucek indak badarah. Takana pitua urang tuonyo,” urang pandorong jo parabo, capek tibo dalam kanai”.
Tangannyo nan mamacik timbangan lah mulai ratek.
Inyo ulang manimbang minyak tu baliek.
Tatap sambilan ratuh gram.
Inyo mancuba untuk katigo kalinyo.
Hasilnyo idak barubah.
Rajo Basa malulue aie ludah. Tenggorokannyo taraso kariang.
Tibo-tibo sadonyo tuduhan nan lah talompek dari muncuangnyo tangiang-ngiang di talingo.
“Kalian panduto gadang!”
“Tukang kicuah!”
“Kalian pancilok !”
Kini kato-kato Rajo Basa raso anak panah nan babaliek ka dirinyo surang.
Tanyato bukan Munin Pono jo Jaimah nan mangurangi timbangan.
Dirinyolah nan salamo ko manjua minyak kurang dari sakilo.
Mungkin awalnyo inyo idak manyadari kasalahan ukuran wadah nan dipakai pegawainyo. Namun sabagai pemilik kadai, inyo lah nan batangguang jawek. Batahun-tahun inyo manarimo gulo sabarek sambilan ratuih gram karano Munin Pono manyasuaikannyo jo minyak sambilan ratuh gram nan inyo jua sakilo.
Kacurangan jo kalalaiannyo alah babaliek ka inyo sorang.
Rajo Basa mancaliek dalam-dalam Munin Pono jo Jaimah.
Kaduonyo tagak jo mato nan lah basah. Jaimah taisak-isak malulua tangih. Munin Pono manunduak, bukan karano basalah, tapi karano hati nyo sangek taluko jo hinaan Rajo Basa.
Rajo Basa mancubo mangecek lambek, suaro nan lah tatahan di tanggorokkan nyo karano alah talonsong indak di usue jo di asa talabiah dulu.
Inyo manyadari bahaso nan kalua samudah menembakkan paluru dan idak bisa ditariak baliek.
“Munin Pono… Jaimah….”
Suaranyo kini nyaris babisiak, mangecek antaro tadanga jo idak.
Munin Pono maangkek kapalonyo.
Rajo Basa mambiek angok dalam-dalam. Iko nan partamo dalam hiduiknyo, juragan nan kayo maraso sangek kaciek.
“Den iyo alah babuek salah.”
Karumunan urang nan banyak tahaniang sakatiko.
“Den lah basalah manuduah kalian tanpa batanyo talabiah dahulu. Den alah mampamalukan kalian dimuko urang nan banyak. Pado hal kalian manggunoan timbangan jo barang nan den jua di pasa.”
Rajo Basa malatakkan timbangan, lalu manunduakkan kapalonyo.
“Den mamintak ampun sabaleh jo kapalo.”
Munin Pono aniang indak manjawek sapatah kato pun.
Luko nan lah ditoreh taraso angek di dado, luko nan idak badarah tapi raso tatusuak ka ulu hati.
Jaimah mancaliek junjungannyo. Aie mato nan taruh bacucuran. Ditangah kesedihan tu, inyo masih mancaliek baso Rajo Basa bana-bana manyasa ateh perbuatannyo.
Rajo Basa malangkah mandakek.
“Den akan mangganti karugian kalian. Den akan manjalehan kasadonyo urang kalau kalian idak basalah, den lah nan salah.”
Munin Pono akienyo bakato lambek-lambek, “Tuan, karugian pitih dapek diganti. Gulo nan pacah bisa dibuek baliek. Tapi kamano muko kadicaliekkan raso malu nan lah Tuan adokkan ka kami nan lah Tuan serakkan.”
Kato –kato tu mambuek Rajo Basa samakin tatunduak.
“Den lai tau,” jaweknyo. “Karano tu, izinkan den mampaeloknyo di tampek nan samo dimano den alah mamamaluan kalian .”
Rajo Basa mancaliek urang kampuang nan rami bakumpue.
Dengan suaro lantang jo kareh, inyo mangecek, “Dangalah den ka mangecek! Munin Pono jo Jaimah idak basalah. Inyo idak panipu. Den nan lah kaliru. Ukuran minyak di kadai den lah nan kurang nan dijadian patokan timbangan. Gulo inyo kurang karano manyamoan jo ukuran minyak di kadai den.”
Urang –urang mulai saliang mancaliek satu samo nan lainnyo.
Rajo Basa manaruihkan kato-katonyo, “Den alah mambangihi urang nan jujur salamo ko, den talalu capek mambiek kesimpulan. Mulai kini ko, den akan memperbaiki sadonyo galeh nan kurang timbangannyo dan den akan angganti karugian urang nan lah balanjo di kadai den .”
Lah sudah mangecek mode tu, Rajo Basa idak mampu manahan aie matonyo.
Juragan nan terkenal kareh kini tatunduak mangaluaan aie mato di muko kilangan.
Bukan karano kahilangan pitih.
Bukan karano takuik kahilangan pelanggan.
Inyo manangih karano lah mancaliek buruak dirinyo sorang.
Namun manyasa sajo indak cukuik.
Masih ado pakaro gadang nan kadisalasainnyo.
Lah barapo banyak urang manarimo barang nan kurang dari kadainyo?
- Timbangan Kajujuran
Bisuak harinyo, Rajo Basa baliek ka pasa.
Kini inyo datang bukan juragan nan kareh jo angkuh. Langkahnyo taraso barek. Satiok suaro urang manggaleh, satiok bunyi pitih koin, jo satiok urang nan macaliek jo balanjo dikadainyo maingekkan ateh kesalahnnyo salamoko.
Inyo mamintak seluruh urang nan karajo tampek nyo mangaluaan timbangan, tampek minyak, karuang bareh, nan sadonyo ukuran galeh nyo.
Ciek-ciek di pareso sangek teliti.
Tanyato alah dicaliek tampek minyak hanyo bisa manampuang sambilan ratuh gram. Ado pulo tapuang jo bareh nan ditimbang. Sadonyo tajadi karano kelalaian. Sebagian lai pegawainyo manggunoan tampek ukuran timbangan nan lah penyok.
Namun Rajo Basa idak mancari alasan untuak mambela diri.
“Kesalahan nan tajadi adolah tangguang jawek den,” katonyo.
Inyo sudah tu mamasang pengumuman di muko kadainyo.
KAPADO SELURUH NAN BALANJO,
TIMBANGAN KADAI KO ADO KELIRU.
SIAPO PUN NAN MARASO DIRUGIKAN,
SILAKAN DATANG UNTUAK MANARIMO GANTI NAN RUGI.
Urang-urang bakarumun mambaco pengumuman tu.
Sebagian urang idak picayo.
“Seorang juragan nan kareh salamo ko maminta maaf kapado langganannyo?”
“Apo bana inyo kamambaliekkan kerugian nan salamo ko?”
Malinan tibo paliang capek. Rajo Basa mambaliekkan seluruh kakurangan nan alah tajadi salampo ko.
“Maafkan den, Malinan,” kato Rajo Basa.
Malinan manarimo ganti rugi salamo ko, inyo mangecek, “Bukan ambo nan pantas manarimo permitaan maaf Tuan.”
Rajo Basa mamahami nan dimukasuik Malinan.
Pado hari pasa bisuaknyo, inyo maminta Munin Pono jo Jaimah datang ka pasa. Namun kaduonyo maraso ragu.
“Awak masih malu basuo jo urang-urang,” kato Jaimah.
Munin Pono mamacik tangan kekasih hatinyo arek-arek.
“Awak idak babuek salah do. Awak datang mambuktikan baso awak indak curang, awak lah babuek bayiek, supayo kebenaran ko tabukti.”
Pagi tu, Munin Pono jo Jaimah mambaok gulo ka pasa. Binuang bajalan lambek-lambek di muko garobak. Ganto kaciek dilihie nyo babunyi nyariang.
Kring… kring….
Katiko Munin Pono jo Jaimah mulai masuak pasa, urang –urang mulai mancaliek ka arahnyo.
Sebagian galak kaciek. Sebagian mandakek untuak manyalaminyo.
“Maafkan kami karano sempat maragukan kalian,” kato seorang pedagang.
“Kami lah talalu capek mambiek kesimpulan jo murah picayo,” kecek nan lain.
Di muko kadainyo, Rajo Basa alah manyadiokan timbangan baru. Timbangan tu tabuek dari basi nan alah dipareso oleh petugas pasa.
Rajo Basa tagak di ateh pangguang di muko kadainyo.
“Sanak- sanak kasadonyo,” keceknyo, “barapo hari nan lalu den lah manuduah Munin Pono jo Jaimah sabagai pangicuah. Tuduhan tu idak bana.”
Pasa nan eboh saktiko manjadi aniang.
“Den bangih katiko alum mamareso kesalahan den sorang. Den mancaliek kekurangan barang pado urang lain, tapi lupo mamareso nan den punyo. Kini den maminta maaf kapado Munin Pono, Jaimah, jo saluruh pelanggan masyarakat disiko.”
Rajo Basa sudah tu maambiek sa golong gulo Munin Pono. Gulo tu dilatakkan di ateh timbangan.
Jarumnyo baranti tapek diangko sa kilo.
Urang –urang batapuak tangan.
Munin Pono mamandang Jaimah. Perempuan itu tersenyum sambie aie matonyo mangganangi pipinyo.
Rajo Basa manyarahkan timbangan baru kapado Munin Pono.
“Tarimolah. Mulai kini, gunokan lah timbangan ko supayo idak ado keraguan lai.”
Munin Pono manarimo jo kaduo tangannyo.
“Tarimo kasih, Tuan.”
Rajo Basa manggeleang.
“Jaan batarimo kasih ka den lai. Justru den lah nan harus batarimo kasih kapado kalian. Kalian alah maajaan apo nan kito agihan kaurang lain akan baliek kadiri awak sorang.”
Sajak hari tu, kadai Rajo Basa barubah.
Inyo mamareso timbangan satiok pagi. Satiok pegawai diwajibkan manimbang dengan ukuran nan bana. Di dindiang kadainyo tapasang tulisan:
TIMBANGAN NAN BANA MANJAGO RASAKI NAN HALAL.
Rajo Basa mambaliekkan sagalo hak pambalinyo. Inyo mancatat namo-namo pelanggan nan acok bananjo tampek inyo, meskipun banyak mengeluarkan banyak ganti kerugian.
Sabagian urang bakato talalu balabihan.
Namun Rajo Basa manjawek, “Pitih nan kalua untuak mambaliekkan hak urang bukanlah kerugian. Kerugian nan sabananyo adolah menikmati hak urang lain.”
Hubungannyo jo Munin Pono samo Jaimah pun baliek manjadi elok.
Bahkan manjadi labiah elok dari nan biasonyo.
Rajo Basa tatek mambali gulo Munin Pono jo Jaimah, tapi satiok kali gulo di timbang di muko Munin Pono. Dak ado nan diagak-agak barek gulo. Idak ado lai kesalah pahaman.
Usaho kilangan tabu samakin bakambang. Gulo buatan Munin Pono jo Jaimah mulai dikenal hinggo ka Kampuang-Kampuang nan jauh. Urang-urang idak hanyo manyukai rasanyo, tapi juo mampacayoi kejujuran urang nan mambueknyo.
Babarapo tahun kemudian, Rajo Basa mambantu mambangun sebuah rumah timbang di dakek pasa. Siapo pun bulieh manggunakannyo sacaro gratis.
Di atah pintunyo tapasang papan kayu nan batulih:
RUMAH TIMBANG MUNIN PONO JO JAIMAH
Katiko papan tu pertamo kali dipasang, Munin Pono maraso terharu.
“Baa kok mamakai namo kami, Tuan?”
Rajo Basa tagalak kaciek.
“Karano dari kalian den baraja kajujuran nan paliang barago, kajujuran idak dicaliek dari penampilan. Kadang-kadang, urang nan idak mampunyoi timbangan justru punyo hati nan paliang seimbang.”
Waktu teruh balalu.
Ladang-ladang tabu tatek tumbuah manghijau. Daunnyo masih menari satiok kali angin dari pagunuangan datang mahambuih. Binuang samakin tua, tapi masih acok tagak di dakek kilangan, mengunyah rumpuk sambie mamandang Munin Pono bakarajo.
“Kok urang cadiek nan baladang tabu sarueh manjadi saparak, tapi kok urang bodoh nan baladang tabu saparak jadi sarueh. Baitulah pepatah mangatokan”.
Pado suatu sanjo, Munin Pono jo Jaimah duduak di muko pondok kilangan.
Langik nan bawarna jingga. Matohari balahan manyuruak di balik gunuang. Udaro mambao aroma gulo nan baru masak.
Jaimah malalokkan kapalo di bahu suaminyo tacinto.
“Uda, dulu Jaimah takuik usaho awak indak bakambang karano tuduhan tu.”
Munin Pono mancaliek hamparan tabu nan bagarak diambuh angin.
“Uda takuik juo nyo diek.”
“Tu baa kok uda tanang-tanang sajo?”
Munin Pono galak saketek, tapi manih dipanangan mato.
“Karano kebenaran mantuak nan ado dalam batang tabu. Walaupun batangnyo digiliang, diperas, jo dimasak dalam api, raso manih tu idak akan barubah. Justru alah melewati sadonyo prosesnyo, inyo labiah baguno jo mancaliekan ciri khas nyo nan selalu manih.”
Jaimah pun tagalak kaciek mandanga kato dari junjuangan nyo nan lamah lambuik.
Dari kejauhan, ganto Binuang babunyi lambek.
Kring… kring….
Malam mulai turun. Cahayo api dari tungku mambayang di muko Munin Pono jo Jaimah. Di dalam kuali, aie tabu mendidih perlahan, mengental, jo barubah menjadi gula.
Aromanyo menyebar ka seluruh Kampuang.
Harum.
Hangat.
Manih.
Seperti kejujuran na akhirnyo menemukan jalannyo sorang.
Sejak peristiwa tu, urang-urang Kampuang Limau Lunggo aie nyo Janiah nan talatak dibawah Bukik Juyiang Nan tinngi manjulang Tampak nan rancak dari gunuang Talang salalu mancaritokan kisah Kilangan Tabu kapado anak-anak mereka.
Mereka bakato:
“Jaan capek manuduah sabalum mamareso diri awak talabiah dahulu. Di asa di usue dulu baru kok batindak,Sebab timbangan nan kito gunokan untuk menilai urang lain, sering kali adolah timbangan nan suatu hari akan manilai diri kito.”
Dan di pasa, di bawah papan Rumah Timbang Munin Pono jo Jaimah, ado suatu pasan nan di tulih oleh Rajo Basa dengan tangannyo sorang:
Sabalum mancaliek jo manimbang kasalahan urang lain, pastikan timbangannyo idak barasal dari kasalahan awak sorang.
Sumber gambar: YouTube free access
