Oleh: Reno Novriani, S.PdI
(Guru SDN 04 IX KORONG, Solok)
Es Cindua Ppalapeh auih, hari paneh badangkang, matohari luruih di ateh kapalo. Si Aguih balari lari pulang dari bamain bola. Tibo di rumah langsuang pai kadapua maambiak galeh, sudah tu balari kalua rumah.
Sudah tu inyo tagak di tapi jalan manantian tukang es cindua lalu. Sadang manunggu tukang es cindua di tapi jalan di muko rumahnyo, indak lamo sasudah itu lalu lah tukang es cindua.
“Teng Teng … teng,” bunyi galeh ditokok dek tukang es cindua. Gadang ati si Aguih. Raso kalapeh auih nan lah tatahan. Raso di bibia tapi cawan.
Tukang es cindua jo sanang hati mamparantian garobaknyo di muko si Aguih tagak. Aguih bagageh maadok an galehnyo sambia mengecek, “bara es cindua sagaleh da,?”
Nyo jawek dek tukang es cindua , tigo ratuih, Guih, bara galeh dek ang?”
“Kok satitiak bara balinyo da?” kecek Aguih batanyao.
“Kok satitiak bialah indak bayia,” kecek tukang es cindua.
“Kok mode itu agiah lah den satitiak satitiak sampai galehko panuh,” kecek Aguih jo bantuak muko polosnyo.
Sambia mauruik dado jo manggeleang kapalo tukang es cindua manyanduak cinduak kadalam galeh aguih.
Dak dapek aka sanang ati Aguih mancaliak es cindua sagaleh di tangan.
‘Tarimo kasih yo da,” kecek Aguih ka tukang es cindua.
Tukang es cindua pai, Aguih mancari tampek duduak dibawah batang jambu sambia minum es cindua. Sadang lamak mairuik es cindua tibo amak si Aguih dari parak.
“Onde Aguih, lamak sanda ang kabatang jambu tu yo! Apo nan ang makan tu? Lamak tampak dek amak,” kicek Amak Yo.
Pucuk dicinto ulam tibo ko ma Guih, agiah lah amak gak saraguak, buliah gak lapeh auih amak,” kecek amak si Aguih.
“Jan saraguak, kasadonyo den agihan ka amak, ambik selah dek amak sadonyo lai. Beko lalu tukang es cindua den bali ciek lai,” kecek Aguih sambia maagiahkan es cindua nan tingga satangah galeh.
“Ndee yo samalero rasonyo karangkungan. Lapeh aiuh amak dari parak.” kecek amak Aguih sambia mamaluak Aguih. Sanang hati Aguih jo amaknyo lah lapeh auih dek es cindua nan sagaleh. (*)
Sumber gambar: Asia Pramulia. Diakses dari google free access.
