Carito, Legenda, atau Mistik?
Oleh: Irwan Malin Basa
Banyak barang lamo nan tasuruak nan dipicayoi dek sebagian urang Minang nan bisa untuak macam macam kaparaluan. Misalnyo, ado batu cincin, karih, pisau, jimaik nan disimpan simpan dek urang urang tuo tuo kito daulu. Ado mangicek an kalau mamakai batu cincin badar basi bisa tahan sanjato tajam. Adopulo mamakai batu nan bisa awak mailang dek nyo. Indak nampak dek urang.
Iko ado pulo ciek nan agak ganjia nan jarang dicaliak an urang. Namonyo “Nokad” atau acok disabuik urang “pitih urang gaek batungkek.” Bantuak nyo bulek dan rononyo kuniang ameh. Gambar dimuko nyo ado urang gaek batungkek dan ado pulo tulisan Bahaso Arab. Bagian di balakangnyo ado gambar padang dan tulisan surek Yasin.
Pitih iko indak banyak nan asli. Kini lah banyak dipalasuan urang untuak dijuabalikan. Walaupun palasu banyak juo nan mambali. Itulah mode nyo urang kini.
Pitih “urang gaek batungkek” tu dipicayoi bisa tahan pisau, tahan biso jo anti cukua. Tapi antah iyo, antah indak, cubo sajo lah surang kok ado basuo jo pitih tu.
Manuruik pangalaman jo bukti bukti nan ado basuo, pitih itu nan asli ado tigo di Pariangan. Mungkin di nagari lain adopulo. Pitih tu lai disimpan dek anak cucu pawarihnyo sacaro turun tamurun. Tapi antah lai punyo “kalabihan” lai antah indak, tantu paralu dicuboan. Dites kicek urang kini.
Nan namonyo kayakinan tantu tagantuang urang nan picayo. Kok indak ado kayakinan, tantu luko juo kito deknyo kok dicucuak jo pisau tajam. Atau kok diagiah biso, gata gata juo deknyo. Kok dikarek rambuiknyo, putuih juo. Hahaha.
Manuruik pandapek ahli ahli sejarah jo budaya, pitih tu ado sajak zaman Bulando. Dipagunokan untuak manuka hasil kabun atau padi urang awak dek Bulando. Haragonyo wakatu itu agak maha. Ciek “pitih urang gaek batungkek tu” saharago sapuluah katidiang padi. Ado pulo nan manyabuik kalau harago pitih tu ciek, samo jo limo karuang buah kopi.
Nan jaleh, pitih itu memang ado disimpan dek urang awak sajak daulu. Aratinyo pitih tu pernah menjadi bagian dari budaya dek urang awak katiko dulu. Pernah dijadikan alat tuka manuka atau jua bali walaupun indak banyak jumlahnyo. (*).
