Oleh: Romi Afrianto, S.Pd
(Guru SD Negeri 12 Tanah Garam, Solok)
Di suatu daerah di kaki gunuang Talang, ado sabuah keluarga nan iduik disitu. Kaluarga ko tadiri dari apak, amak, Jo anak anaknyo. Anak partamo banamo Mardianis biaso dipanggia ni Mar. Anak kaduo banamo Maizal biaso dipanggia uda Zal. Anak katigo banamo Asmanizar dipanggia Uni As. Anak ka ampek banamo Amrizal biaso dipanggia Uda Am.
Ado juo kironyo tigo urang lai. Anak kalimo banamo Laila dipanggia Ila. Anak ka anam banamo Juli Herna dipanggia Rena, sadangkan anak ka tujuah banamo Elmida nan biaso dipanggia El. Kasado nyo lah barumah tanggo jo alah punyo anak. Nan maunian rumah tu anak bungsu untuk manjago rang gaek nyo.
Da Am adolah saurang anak laki – laki dari 7 badunsanak. Dari 7 badunsanak tu, hanyo 2 urang anak laki – laki. Dibandiang jo si Zal, Da Am ko urangnyo suko manang surang. Pandapeknyo wajik ditarimo dek nan lain bia pun pandapek ko salah jo marugian.
Indak pernah nyo sakalipun manarimo saran dari uni mo udanyo surang, apo lai pandapek adiak – adiaknyo nan lain. Inyo maraso bana surang, kadang lah mangakibaik an patangkaran sasamo dunsanak. Diantaro adiak mo uni sarato uda si Am ko ado surang nan barani manjawek kato Da Am ko, yaitu adiak padusinyo nan banamo Ila.
Ila ko lah punyo laki nan banamo Anto, jo lah punyo 3 urang anak. Satiok ado pandapek Da Am nan kurang pas rasonyo Ila kamambantahnyo, Da Am acok bangih ka Ila.
”Kau la panjawek kecek den mah, apo nan den katoan itu nan ka kito lakuan,” kicek Da Am.
“Den dak manjawek kato Da Am do, den hanyo mangatoan rancak dipaiyoan dulu baru ambiek kaputusan, kalau bana kecek Da Am tu itu nan dipakai, tapi kalau salah rancak dipakai mano nan sasuai, jan pasoan kato Da Am sajo,” Kato Ila manjawek kato udanyo.
Acok diantaro Ila jo Da Am bajawek kato, kadang lah kasa kato Da Am ka Ila.
“Kok dak bisa kau manarimo kecek den jan kau baliek juo ka rumah ko, rancak kau di Solok sae lai, abehan sae lah laki jo anak kau tu di Solok,” bantak Da Am.
Manarimo kato sarupo ko Ila acok manangih dek nyo. Lah dibanaan ka udanyo ko dak bisa juo do. Amak jo Apak lah tuo, dek mampatenggangan anak – anaknyo amak jo apak acok manangih surang.
Dek talampau bapikia akienyo apak sakik, lah dibao barubek dak kunjuang cegak do, sagalo ubek lah dipakai, mulai dari ubek alami sampai ka ubek dokter, dak ado nan mempan do.
Satiok hari, apak mangigau dalam laloknyo, mancaracau sajo kato apak ko. “oi anak den jan batangka juo, laki – laki jo padusi samo sae, dak bisa manarimo pandapek do” ibo ati den dek kalian mah, lah bakandak kalian den mati yo,” kato apak nan kalua dalam laloknyo.
Sanjo tu sakiro pukua limo, katiko tu tabik sasak angok apak ko. Dak tau jo urang balau do, cameh sado kaluarga dibueknyo, Di paiyoanlah basamo.
”Kok mode iko kondisi apak kito, rancak kito bao ka rumah sakik” kato uni Ila nan banamo Si As.
“Dak bisa do,” kato Da Am tadi. “Bia se lah apak disiko, den dak ka maantaan ka rumah sakik apak den do, maantaan mati se ka rumah sakik tu nyo, rancak bia apak den ko matinyo disiko sae” bantah Da Am kato Uninyo.
Nan lain lah bi manangih, lah mambana amak jo dunsanak nan lain ka Da Am supayo apak dibao ka rumah sakik, dapek juo katolongan sakurang-kurangnyo dapek infus tuak panolong kuek badan apak. Nan Da Am dak juo manarimo do, nyo basikareh tuek apaknyo tatap di rumah sajo.
“Da, maaf dulu dih, den sato mangecek!” kecek Anto laki Ila.
“Ko pandapek den da, kok umua dak dapek dek awak do, rasaki, mati, jodoh Tuhan nan punyo kuaso, tapi da, salagi kito barusao tuek babuek nan mungkin dak manjadi raso sasa suak dek kito kasadonyo, rancak kito babuek da, masalah apak kini ko, lah co iko kondisi balau da, ka kito patangkaan juo lai, apo dak ibo uda ka apak, apo dak sayang uda ka apak da, kalau lai rancak kito bao apak ka rumah sakik, kalau di sinan balau pai da, bararti umua balau sampai disinannyo tu, kalau dak ado nan kito pabuek da manyasa bisuak da, dak guno lai do,” kiceknyo panjang leba.
“aie mato jatuah dak punyo arti do, tapi kalau lai barusao juo kito baru, manangih bana kito suak ado artinyo da, ado nan kito lakuan tuak apak da,” umbuak rang sumando tu.
Dek mandanga kato si Anto ko, akienyo Da Am namuah mambao apaknyo ka rumah sakik. Tapi di rumah sakik nan Da Am ko dak sato manjago apaknyo do. Inyo kamari pai sae, duduak di suduik marokok sambie minum kopi, lah diminta tuek sato mangawani apaknyo di ruang IGD nyo dak sato do. Inyo lamak maota jo urang nan ado duduak dakeknyo.
“Da, nampaknyo wakatu apak dak lamo lai do, rancak uda kawani apak dulu, mungkin dek mandanga kato uda, apak bisa tanang lai, bacoanlah kaji gak sapatanggak dek uda, antah jo itu apak bisa sadar da,” kato Anto mambujuak Da Am tadi.
“Dek sagan ka rang sumando mungkin, akienyo Da Am ko masuak juo ka ruang IGD tu, tapi talambek sabalun sampai di tampek apaknyo, apak lah maambuih an angok tarakhir. Baliau maningga, dunsanak nan lain jo rang sumando ikuik malapeh apak pai, nan Da Am dak ikuik do.
Manangih sajadi – jadinyo Da Am ko, sabana marauang, tapi apo nan ka dikatoan lai, lah talambek, manyasa dak ado gunonyo do, nan apak dak ka iduik lai do. Anto nan dapek mananangan Da Am tadi, indak dapek da sakandak padi, sakan balah rang tumbuak luluah, indak dapek da sakandak ati, kandak Allah juo nan sungguah.
“Kini apak dak sakik lai do da, apak lah baiak mah, relakan da, jan bao ka tangih, sakik apak wak dek tangih tu beko” kato Anto ka si Am.
“Tapi Nto, apo nan lah den pabuek, dek karano den apak sakik, mamikian patangkaran den jo dunsanak den surang jadi pamikiaran dek apak, dek den apak dak sadar do, den dak lo sato malapeh apak pai do, anak sarupo sia den ko, manyasa den Nto, baliak an apak den liek, den ka dangaan kato apak” kecek Da Am.
“Istigfar da, dak ado arati rauang awak do da, nan apak dak bisa babaliek do, lai bana ka aie mato darah nan dikaluan apak dak bisa baliek do. Kini nan paralu, doakan apak da, amal ibadah apak bisa ditarimo, sagalo pabuatan apak salamo iduik balau jadi panunjuak jalan ka sarugo da, doa uda sabagai anak laki – laki diarok an samo apak da” kecek si Anto ka Da Am.
Akienyo Da Am bisa manarimo apaknyo lah maningga. Salasai acara panguburan apaknyo, Da Am sujuik minta ampun ka amaknyo, minta maaf ka uni, uda, sarato ka adiek – adieknyo, sarato bajanji dak ka mambuek dunsanaknyo ibo ati lai do.
Nyo ka manjadian amaknyo sabagai jalan tuek bababakti supayo dapek mambaleh jaso ka amak sarato apak nan alah maningga.
Takana kisah Da Am ko, takana kito dek papatah rang tuo, manyasa dulu pandapatan, manyasa kamudian dak baguno. (*)
Sumber gambar: Spotify. Diakses dari google free access.
