Penulis : Vera Syukriana,S.Pd
(Guru SDN 03 Simpang Rumbio, Kota Solok)
Nora jo Si Aik lah lamo manikah. Banyak masalah rumah tangganyo. Urang ko indak tingga basamo karano Si Aik karajo di tambang di daerah Sijunjuang. Hati Nora lai nio manuruik an laki tapi tampek tingganyo jauah dari nan rami, takah di daerah padalaman dakek hutan. Akianyo nora tingga di kampuang sarumah jo urang gaek.
Satiok laki Nora pulang, inyo ndak pulang ka rumah amak Nora tapi karumah ibuknyo surang dulu baru ka rumah amak Nora. Hati Si Aik kurang lamak samo amak nora karano amaknyo acok manyindie-nyindie mangecek.
“Pailah bakirok lae, urang kalau lah barumah tanggo ko badikari indak mahanda sajo doh”, kato amak Nora di dapua.
Sajak hari tun, Si Aik kurang maraso sanang duduak di rumah amak Nora. Angek-angek ikuanyo taraso nio capek pai dari rumah tun. Kok mangecek jo amak Nora indak ado katonyo nan kamanyanangan ati minantu.
Mancaliak kaadaan iko, Si Aik sumangaik bakarajo sahinggo duo tahun manikah inyo alah mambuek an Nora tampek tingga jo anaknyo nan baumua satahun. Sajak itu iduik urang ko sanang. Kok pulang Si Aik karajo, pai bahonda-honda iliae mudiak. Bahagia bana bantuak keluarga urang ko sahinggo urang ndak manyangko ado masalah di rumah tanggonyo.
Nan sabananyo kalau di rumah laki nora urang nan acuah sajo kabini. Antah inyo kapanek an karajo antah manikmati ari liburnyo. Karajonyo main HP.
Nora dibuek an lapau dek laki. Banyak anak-anak nan balanjo katiko bulan puaso. Sudah tarawiah urang pulang musajik singgah balanjo. Dari kababuko Nora lah bukak lapau. Manjua pabukoan bagai.
Inyo karajo surang, kaja-kajai maambiak an nan dipasan anak-anak.
Ado nan pasan mieso, pasan mie abuih, bakwan jo banyak nan lainnyo. Yo sabana latih badan nora. Kok tibo lah kalalok, tulang raso kararak dek tapanek manggaleh. Lakinyo aniang sajo di rumah. Ndak amuah manoloang saketek alahnyo.
Amak nora ndak amuah pulo manoloangan. Amaknyo pandai manyalah-nyalahan lakinyo.
Apolai sajak Nora lah badikari. Rumah Nora nan sangaik rancak dari rumah amaknyo. Isi rumahnyo mewah, barasiah lo lai. Kaadaan ko mambuek dunsanak Nora iri.
Mintuo Nora iri lo ka minantu. Anaknyo banyak maagiah pitih ka minantu daripado ka inyo.
Kok lah pulang si Aik karajo, ibunyo si Aik manahan anaknyo indak mairauan kalau Nora yo butuah lo jo laki. Ndak ado nan bapihak ka Nora. Baiak amak, mintuo, apalai laki. Sabana mauruik dado Nora manjalani iduik. Jatuah ka dalam aie mato.
Kaadaan ko mambuek Nora putuih aso. Nan ado tampek bagantuang ciek Allah. Lapau lah mulai langang, anak-anak ndak do nan balanjo. Nora duduak tamanuang di suduik lapau nan banyak piriang kumuah jo sarok baserak. Nora manangih surang di lapau sambia mangana – ngana ndak ado nan bapihak ka inyo.
Apolai mancaliak tingkah laki nan sahari tun acuah. Lah babaliak-baliak Nora ka rumah mintak toloang tapi nan laki acuah sajo.
”Da…ooo Da, toloanglah adiak katiko pulang ko, jan baHP sajo dari cako”, kecek Nora sambia mandakek ka tampek duduak lakinyo nan kalamak an galak-galak bantuak urang jatuah ati.
Kironyo nampak laki ma WA jo padusi lain pakai kato-kato takah urang laki bini. Api cimburu mambaro di ati Nora.
Malam tun, malam ka duo puluah bulan puaso, tajadilah nan indak disangko-sangko. Nora pai ka rumah, nan laki duduak surupo cako juo di kurisi.
“Lah abih kasiah uda ka adiak, acuah sajo nampaknyo kini. A kurang ambo lai, kok basuo sakali limo bulan. Lah basuo Uda acuah. Sia padusi nan basayang-sayangkan tu?” kato Nora maariak-ariak.
Laki Nora takajuik. “Baa mantun adiak mangecek. Uda ma WA kawan karajo. Lah duo ari Uda di kampuang, lun ado maiigiah kaba”, jawek lakinyo mangareh.
Nora mambaleh kecek lakinyo sambie manangih.
”Maagiah kaba? Yo paralu bana dek Uda urang tun dari ambo. Indak sakali duo kali ambo mancaliak WA Uda, jo paja tu juo uda mangirin-ngirin pasan. Kato-kato Uda lah labiah bantuak urang laki bini. Manikah Uda agaknyo dibalakang ambo yo?”
Si Aik bajalan ka kamar indak manjawek. Nora mahantak pai kadapue. Tadanga dek Si Aik ado barang jatuah. Nyo balari ka dapue kironyo bini Si Aik alah takalapak di lantai.
”Baa diak? Apo ko?” kecek si Aik sambie maambiak galaih baisi saketek aie.
“Iko nan katuju di Uda kan? Indak Uda nan aden patenggangan tapi amak jo ibuk Uda nan samo jo parangai Uda. Acuah sadonyo”, kecek Nora mangaluaan aie mato jo suaro taputuih-putuih.
Si Aik maidu aie dalam galeh cako kironyo baun racun. “Iko racun saladari nan babali cako patang”, bisiak Si Aik dek mancaliak boto racun di bawah meja makan.
Mancaliak muncuang Nora lah babusa-busa Si Aik maambiak taromoih, maiisi aie angek ka galeh. Nyo campue jo aie dingin saketek. Si Aik mulai rusuah.
“Diak minun aie ko…minun diak”, manangih manyasa.
Indak lamo sudah tun, Amak Nora datang dek mandanga heboh dari lua. Dapue Nora dakek jo rumah amak Nora. Amak lansuang ka dapue. Mancaliak anaknyo indak badayo, amak mamangku anak nan disio-siokan salamo ko sambie maiirik minantunyo sambie mangecek, “ang bunuah anak den, ang racunnyo.”
Banyak tuduahan nan kalua dari muncuang amak.
“Nun…Linuuun, capeklah kamari. Akak kau dibunuah di lakinyo. Talepon pulisi.”
Adiak Nora maambiak HP di saku sarawanyo, lansuang manalepon kawannyo nan pulisi.
“Rik, akak wak dibunuah lakinyo, capeklah kasiko”, sambie mangaruang-ngaruang.
“Da toloang bini wak da, nyo minun racun. Taleponan urang rumah sakik ciek, Da”, kecek Si Aik manalepon mantari nan ado di kampuang. Si Aik cameh bana. Nyo ndak takuik jo pulisi nan kadatang tapi takuik mancaliak bininyo nan tabariang. Badan bininyo mulai maijau. Indak manggarik.
Amak Si Nora jo Linun malarang Si Aik mandakek ka bininyo. “Pambunuah…ang den masuak an ka pinjaro”, ariak amak sambia garang.
“Nora…a nan tajadi, jaweklah,Nak! Baa kok sampai diracun mangko. Anak duo ketek-ketek.”, imbau amaknyo dimuko badan nora nan lah mulai dingin.
Indak lamo sudah tu, ambulan babunyi datang manjapuik Nora. Urang Rumah Sakik lansuang manaiak an Nora ka oto. Si Aik indak buliah mangawanan bininyo. Oto pulisi datang lo katiko bini Si Aik banaiak an ka oto. Si Aik ditanyo dek pulisi.
“Laki Si Nora mambunuah anak deeen!” kato amak Nora ka urang banyak nan bagarumun di halaman rumah Nora.
Noralah pai, nan Si Aik tingga manjalehan sabaok bininyo takah iko. Kecek Si Aik, toloang beko lanjuik an lai, ambo ka pai ka rumah sakik. Si Aik bagageh ambia kunci onda, “Iriangan ambo Pak Pulisi jiko ndak piacayo.”
“Malarikan diri ang yuang”, kato uwan Nora paliang gadang. Uwan Nora nan baru datang lansuang maninju sumandonyo. Uwan Nora emosi dek Linun manalepon cako mangecek an Nora dibunuah lakinyo.
Heboh di halaman wakatu tun. Pulisi malarae mananangan kaadaan.
Baa bana Si Aik manjalehan nan dunsanak Nora indak picayo. Pulisi manaiak an Si Aik ka oto sasudah onda jo helemnyo diambiak urang kampuang.
Pulisi mambaok Si Aik ka IGD Rumah Sakik. Kironyo Nora lah batutuik jo kain.
“Ko nan mambunuah anak den”, amak Nora maadok an tunjuaknyo jo mungko sambi bangih.
Si Aik mancaliak bininyo sambie mambukak kain nan manutuik maik padusi nan lah limo taun basamonyo. “Diak ampunkan Uda. Uda manyasa mambuek adiak takah iko”, bisiak Si Aik dalam hati nan taisak-isak manangih.
Kurang labiah duo jam, manjalang subuah Nora dibaok ka kampuang. Kaluarga Nora naiak ka ambulan. Si aik jo oto pulisi mairiangan.
Tibo di kampuang maik Nora dibariangan di tangah rumah amaknyo. Anak-anak Nora manangih mararau-rarau mamaluak maik Nora.
Aie mato urang banyak indak tabanduang mancaliak anaknyo.
Si Aik indak dibuliahan dunsanak Nora naiak ka rumah. Ibu Si Aik jo uninyo diusie dari rumah amak Nora. Kaluarga Si Aik bakumpue di Rumah Nora. Pulisi mananyo-nanyo apo sabaok kajadian ko. Pulisi mambaok barang bukti.
Ibu Si Aik picayo kalau anaknyo indak mambunuah Nora. Sadonyo dunsanak Si Aik mandukuang, picayo saratuih persen kalau iko kasalahan Nora.
Dihari pakuburan Nora, Si Aik bisa mancaliak bininyo dari jauah. Si Aik diawasi kaluarga Nora. Pulisi datang lo hari tun. Anak-anak Nora indak buliah mandakek ka apanyo.
Salasai acara pakuburan, Si Aik babaok ka kantue pulisi. Tabukti Si Aik indak basalah. Si Aik pulang ka rumah ibunyo. Lalok bakaluak dikurisi ruang tamu. Matonyo sambok, pancaliak an kosoang, tamanuang-manuang manyasai kasalahannyo ka Nora.
Mintuo Nora sadiah mancaliak anaknyo takah iko. Bini mati anak bajauahn lo dari Si Aik. Sabana ndak raso dibadan nyao anaknyo. Pangana Si Aik ka Bulan jo Bintang. Duo urang anaknyo nan sangaik butuah kasiah sayang jo paratian kaduo urang gaek.
Sabana tarumuaik Si Aik sajak ditinggaan Nora. Mudah-mudahan jadi palajaran dek Si Aik jo awak sadonyo untuak maharagoi urang tadakek apolai bini nan satia. Bini nan amuah manjago kaluarga katiko awak ado jo tiado. Jan sio-siokan kapicayoan bini. Jan bamain api kalau ndak amuah tabaka.
Kok jadi bini, jan singkek aka, kana Allah jo anak-anak sarato kaluarga. Kalau lah bunuah diri, narako manunggu, ndak ari katobaik mamintak ampun ka nan satu. Pakuaik iman, pabanyak istigfar, pabanyak ibadah jo sibuk an diri jo nan elok-elok. (*)
Sumber gambar: Astro Awani. Diakses dari google free access.
