Oleh: Irwan Malin Basa (Tim Ahli Cagar Budaya di Kab. Tanah Datar)
Urang awak Minang dari dahulu lah pandai mambuek macam macam alat alat batani, batukang, mamasak jo manangkok ikan. Alat untuak manangkok ikan tu ado nan disabuik kayia (panciang), adopulo tangguak, adopulo jalo, dan ado pulo namonyo lukah.
Nan agak jarang basuo dek urang kini adolah lukah untuak manangkok ikan. Di sabagian daerah lukah adopulo panangkok baluik. Lukah dibuek dari bilah dan Ado juo dari rotan. Bilah barasa dari batuang nan dibalah. Sasudah itu dirauik aluih aluih sasuai jo ukurannyo.
Lukah ikan agak daripado lukah baluik tapi bahtuaknyo ampia samo. Kalau taragak manangkok ikan atau baluik, lukah dilatak an dalam aia atau dakek lubang baluik. Sabalun dilatak an, dilatak an makanan ikan atau makanan baluik dalam lukah tu. Biasonyo caciang, ubi, dan makanan lain nan katuju dek ikan nan baunnyo bisa mendatangkan ikan.
Sasudah dilatak an malam hari, lukah dicaliak bisuak pagi. Kalau ikan atau baluik lah masuak kadalam lukah, inyo indak bisa kalua lai. Sabab di Kapalo lukah tu ado namonyo ‘papek’ panutuik kapalo lukah. Papek dilua, runciang di dalam.
Kato kato atau ungkapan tantang lukah acok juo dipakai dalam petuah atau istilah di Minangkabau. Misalnyo, masuak luka. Aratinyo, lah masuak, indak bisa kalua lai. Samo Jo masuak karuang atau takicuah.
Adopulo ungkapan ‘lukah madok mudiak’. Aratinyo, apo sajo nan masuak dimakannyo. Kok bahaso urang kini, rakus, tamak, loba. Lukah memang manampuang sajo apo nan masuak.
Di lain daerah, adopulo istilah ‘bantuak lukah Jo aia’. Aratinyo, bauji cadiak. Kicek aia, Inyo nan manguruang lukah, tapi kicek lukah, Inyo nan manguruang aia. Kok bahaso kini, bauji galia, bauji cadiak, pantang kalah. (*).
