Oleh: Rahmiwati, S.Sn. (Guru MTsN Kota Solok)
Pagi tu katiko sadang maampaian kain si Gadih basobok jo si Ta nan tingga di sabalah rumahnyo. Si Ta sadang kadapua tu kalua dari pintu dapua pai mancigok karambia nan ka dikubak. Katiko nampak si Ta, si Gadih langsuang bacilotek.
“Nde..lah rayo lo bisuak, kapai manjalang lo nan kadipikian lai, aa samba nan ka dibuek, aa sanoknyo bagai. Yo paniang, ko baru lapeh sasak sudah mambali baju rayo anak, kau lai ndak Pai manjalang Lo Ta?” kicek Si Gadih.
“Ndak, den ndak ado takah-takah itu lai do, mintuo den lah modern. Asa kami lai tibo lah sanang ati amak nah kecek mintuo den,” Jawek Si Ta.
“Lamak lo kau yo Ta, ndak payah bantuak den ko doh, den naiak lu, nasi den sadang tajarang tadi,” baleh Si Ta.
Sampai di ateh rumah Gadih basobok jo amaknyo di dapua.
Gadih: “mak..lamak lo si Ta tu ndak. Inyo ndak pai manjalang bisuak do, pai rayo se nyo. Ndak mambaok sabagai alah je deh. Kecek mintuonyo lah tibo se nyo di rumah lah sanang ati amak nak. Kok takah tu lo den baa mak? Tanyo Si Gadih ka Amak nyo.
Mandanga si Gadih mangicek bantuak itu, langsuang tinggi nada suaro Amak si Gadih.
“Apo kecek kau Gadih? den manggadangan kau jo pangaja, ndak ado den maajaan takah itu doh. Pai manjalang tu ndak mambarek an awak bagai do nak..sakali sataun paliang indak kau mancaliak mintuonyo, Sambia basilatu rahmi. Kicek Amak Gadih maaja anaknyo.
Gadih Nndak dapek kicek mandanga pasan Amak nyo tu. Inyo tamanuang sajo. Ndak tantu nan kadikecek an.
“Anaknyo lah jo awak se maabehan kau jo anak kau. Bara payahnyo manggadangan anaknyo, kini kau lah tau sanang sajo nyo abehan dek laki. Sakali sataun kau mancaliak amaknyo malenggang lo kau ka situ, yo ndak ado parasaan namonyo tu. Kok dek amaknyo tantu iyo, asa lai batamu jo anak minantu lah sanang ati, namonyo urang gaek banyak mangalah,” tambah Amak si Gadih tek lai.
Gadih indak manjawek. Hanyo dism sajo sambia maangguak angguak balam.
“Ciek lai ka untuak panjawek tanyo urang, maklum lah diawak ko banyak urang nan suko maurus urang lain. Dek inyo ndak baa tapi urang sabalah manyabalah nan maangek. lai pulang minantu etek, aa nyo baok, bara macam sambanyo, aa sanok nyo. Itu tanyo urang, kok ndak ado kau mambaok nan ka malu mintuo kau juo..nyo anggap remeh dek urang. Samakin ditambahnyo pangaja dek Amak Gadih.
“Kok dapek tradisi-tradisi nan lai rancak tu dan sasuai lo jo agamo isilam jaan lah ditinggaan. Bak kato papatah niniak awak dulu adat mangato syarak mamakai, syarak basandi kitabullah. Kau mahormati urang tuo tu, kalau lah balaki, urang tuo awak ndak amak jo apak nan manggadangan awak se do, urang tuo laki urang tuo awak juo tu nah. Kalau kau ndak hormat ka mintuo tu anak kau ndak lo dakek jo bakonyo doh. Kok tajadi aa bisuak di awak tu nyo lengah sajo,” tutuik Amak si Gadih.
“iyo lah mak.. tu aa den buek ncak mak?” Tanyo si Gadih.
“Takah nan biaso juo lah, samba gak tigo macam, tambah jo kolak, kue gadang gak ciek. Ko lah den ansua marameh karambia, kau giliang lah lado lai ntuak mbuek kalio,” baleh Amak nyo.
“yo mak,” jawek Gadih sambia maansua karajo.
