Tukang Tulih: Irwan Malin Basa (Dosen UIN Mahmud Yunus Batusangkar, Sumatera Barat)
Satiok taun urang di dunia ko marayokan atau mamparingati taun baru Masehi. Tamasuak pulo di daerah Minangkabau atau Sumatera Barat. Antah sajak pabilo urang awak sato sato pulo marayokan taun baru, antah lah. Indak pulo ado catatan nan jaleh.
Kiniko, sabagian masarakaik awak baiak tuo atau pun mudo, jantan Jo padusi, lah sato marayokan taun baru. Rugi nyo kok ndak pai basikencak di taun baru tu. Paliang kurang sato mamanggang manggang ubi atau jaguang di muko rumah Basamo Samo. Tu dibuek api unggun. Kok lai ado pitih, dibali kambang api agak saketek. Hahaha.
Lai ado taun baru diparingati di Minangkabau saisuak? Tantu Indak. Sabab Minangkabau indak ado punyo taun inyo surang. Paliang nan ado taun Islam tapi banyak urang Minang kini nan indak apa namo bulan nyo tu.
Namo hari pun urang Minang banyak maambiak dari bahaso Arab. Contoh nyo: bulan Muharam, Sapa, rajauk, Sakban, bulan puaso, atau Ramadan, idul Fitri atau Rayo, bulan haji atau zulhijah, dan bulan zulka’dah.
Namo namo hari pun diambiak dek urang Minang dari Bahaso Arab. Misal nyo: nayan atau sanayan dari isnin, lasa dari salasa, rabaa dari arbaa atau rabia’, kamih dari khamis, jumaik dari jum’ah, satu dari sittah, akaik dari Ahad.
Alun Ado batamu dek ambo Namo hari dalam Bahaso Minang lai. Lah banyak pulo buku buku lamo disilau atau dibaco baco, indak juo basuo. Antah kok pangalan ambo nan sayuik, toloang diuleh.
Jadi, saisuak indak ado urang awak marayokan taun baru do. Kalaupun taun baru Arab, indak Pulo dirayokan. Malah kadang kadang indak tau kito kalau lah masuak bulan Muharam atau taun baru Arab. Akui sajolah angku. Toloang inok manuangkan.
Itulah urang Minang sebagian, banyak nan tagia sajo. Turuik turuik an. Urang taun baru, inyo taun baru Pulo. Kadang lah panek buya maingek an, Jan pai juo marayokan taun baru tu, Indak budaya awak itu do, Inyo bahondoh pondoh juo Pai. Ancau kabirau. Anyuik Minangkabau. (*)
Sumber gambar: Bola com. Diakses dari google free access.
