Oleh: Rahmi Nurna Wati. (SMP Negeri 4 Kota Solok)
Ardi murik SMA kelas duo, tapi kalakuannyo kadang indak mancaminkan anak sikola. Padohal inyo anak samato wayang dek Amak jo Abaknyo, harapan gadang tatompang ka si Ardi nan basikola, kok lai katabangkik juo batang tarandam.
Samanjak abaknyo masuak panjaro, karano tabukti jadi tukang anta barang haram, tinggalah amaknyo surang manggadangan anak. Indak ado nan bisa diubah, nasi alah manjadi bubua. Abak Ardi, nan dulunyo tukang ojek. Tapi karano tadasak pitih, utang manumpuak, kaparaluan makan jo sakola anak, inyo talilik utang. Dek pikiran sampik, dimano aka, dima kabisa, diusahokan sagalo nan ka manjadi pitih.
Batarimolah pintak urang nan manyuruah maantakan barang ka alamaik nan inyo agiah. Abak si Ardi ko awalnyo indak tahu kalau barang nan ado dalam bungkuih kaciak itu adolah narkoba, tapi pas disadari, alah talanjua masuak dalam lingkaran hitam.
Samanjak kajadian tu, Amak Ardi maupah di sawah urang untuak biaya hiduik sahari-hari. Pagi-pagi bana, sarupo biaso, ambun masih manggantuang ka rumpuik di pamatang sawah. Udaro dingin manusuak sampai ka tulang. Amak Ardi alah mulai karajo di sawah urang. Bukan dek pilihan, tapi dek buruak untuang di tangan, tapaso bagantuang hiduik jo induak samang.
Di pondok ketek badinding palupuah balantai papan nan alah lapuak, Ardi bakameh kapai sikola. Ardi mamakai baju sikola nan alah lusuah warnanyo jo sarawa nan alah senteng di kaki, cabiak pulo di lutuik. Baju nan dipakai Ardi adolah baju pambarian urang sabalah rumahnyo nan alah tamaik sikola SMA. Indak pernah diganti karano amak Ardi hanyo surang bakureh, samanjak abaknyo masuak panjaro. Pagi tu, amak Ardi pulang sabanta dari sawah, mamastikan anak tungga nyo lai barangkek ka sikola.
“sikola elok-elok yo nak, jan waang turuik an pulo oyong urang, anak urang tu induak nyo barado, nan awak ko mode ko nyo nak, amak surang nyo nan bakureh, nan apak waang antah ka bilo kapulang. ndeeh Nak, untuang-untuang lai jadi urang waang bisuak nak, barubah nasik waang” kato amak Ardi sambia maagiah pitih limo ribu untuk balanjo anaknyo di sikola.
Amak Ardi adolah urang tuo nan sangaik panyaba, panyayang ka anak, rajin bakureh supayo anaknyo bisa samo jo anak urang nan basikola.
Ardi maangguak, ndak basuaro, sambia maambiak pitih nan diagiah amaknyo. Tapi sabalum amak nyo tibo tadi, Ardi anok-anok maambiak bareh di dalam buntia nan talatak di dapua. Dibungkuihnyo jo asoi ketek dimasuakkan ka dalam tas, bia ndak katauan dek amaknyo.
Sasudah mamakai sapatu nan alah tipih tapaknyo, Ardi bajalan kalua rumah manuju rumah sikola. Ardi galak galak manih di jalan, karano maraso sanang jo barasil mangicuah amaknyo. Ndak ado raso basalah di hati Ardi, malah maraso bangga jo dirinyo nan santiang manuruik panilaiannyo. Sabalun sampai di rumah sikola, Ardi baranti di Kadai Tek Mar.
“Tek, wak jua bareh tek, amak wak manyuruah untuak balanjo di sikola”. Ardi langsung maaleh kecek di muko bia ndak salah sangko urang lapau ka inyo.
Mandanga kato dari Ardi, Tek Mar basadio mambali bareh dari Ardi. Sasudah dicupak, Tek Mar maagiah pitih duo puluah ribu ka tangan Ardi. “Tarimokasih yo tek” kato Ardi sambia kalua dari lapau.
Ardi lanjuik bajalan, sanang hati ndak kapalang, arah langkahnyo indak masuak ka gerbang sikola, tapi babelok ka kadai nan talatak di balakang sikola. Kadai Tek Mijuh nan sabantuak jo gudang, kursi nan alah lungga pakunyo, meja tuo hampia patah. Tapi, baa kaba a nan Ardi jo kawan kawan nyo labiah sanang duduak-duduak di situ dari pado baraja di dalam kelas.
‘”Hari ko bia aden traktir kalian,” kato Ardi jo gaya santai malatakan rokok jo gorengan di ateh meja kadai Tek Mijuh nan alah balubang-lubang dimakan anai anai.
“Ondeeee mande, mantap kawan deeennn kini,” kato si Izul sambia maambiak gorengan nan talatak di meja.
Riyan hanyo mancaliak ereng sambia batanyo, “ dari ma ang dapek pitih Di? Patang ang kecek ang ndak ado pitih untuk balanjo, kini baa kok lah ado se rokok jo goreng ko? Curiga lo den jo waang mah.”
“Biasolah, Bisnis rumahan” kato Ardi entiang.
Riyan mancaliak ka tas Ardi, sambia mangaruik an kaniang, batanyo ka Ardi, “ lai ndak bareh amak ang lo ang baok liak?”
“Cuma sangeneknyo, dapek duo puluah ribu” jawek Ardi sambia galak.
“tu waang agiah se den duo ribunyo” kato Alan. Jo muko berang nyo si Alan tagak langsuang pai ndak mangecek.
Duo hari basilang, amak Ardi dapek surek panggilan dari guru di sikola nan di antakan dek si Alan ka rumah. Dalam hati amak Ardi batanyo-tanyo, “ manga kolah ko, basurek bana lo, ado a lo kolah ko, pado anak den lai rajin ka sikolah tiok hari”.
Kironyo, si Alan ko lah yang malapor ka guru tantang kalakuan Ardi nan acok manjua bareh amaknyo di kadai dakek sakola.
Bisuak harinyo, amak Ardi datang ka sikola manamui guru nan maagiah surek panggilan. Baliau datang mamakai baju nan alah lusuah, baju nan paliang rancak nan inyo punyo. Wali kelas Ardi, Ibuk wati mamulai mangecek elok-elok.
“ Maaf yo Tek, iko kami dapek kaduan dari kawan si Ardi, katonyo Ardi mambaok bareh dari rumah untuk dijua. Lai satau etek tu tek? Tu si Ardi acok bana ndak masuak kelas, bamain-main sajo di balakang sakola, bauru-uru jo kawan. Alah banyak tatingga palajarannyo tek, bekko takuiknyo tingga sikola, ndak naiek kelas” kicek gurunyo.
Amak Ardi tadiam, wajahnyo pucek, pancaliakan kosong. baliau mancaliak ka arah Ardi nan duduak di sabalahnyo. Jo suaro lunak amak batanyo ka anaknyo jo bahaso nan paliang dalam dari hatinyo.
“Ndeh nak, kajadi apo ang bisuak, manga kok takah ko bana parangai waang… Ndak ibo ang jo mande ang ko… mamungguang kalangik, bapaneh hujan di sawah urang, untuk ang bisa basikola. Arok amak wak, jadi urang juo waang bisuak, Yuang, tapi iko baleh ang ka amak ang surang, kadalam tangih den mancaliak parangai ang takah iko mah nak, lah nyinyia amak mangecek an ka waang, elok-elok sikola, jan turuik an oyong urang.”
Ardi hanyo aniang sajo, ndak takao manjawek kecek amak nyo. Hari tu Ardi mambuek surek pajanjian jo guru nyo di muko amaknyo. Bajanji ndak ka maulang parangainyo nan sudah-sudah.
Hari baganti, tapi luko di hati amak alun taubek, Hari pambagian raporpun tibo. Amak datang ka sikola untuak manjapuik rapor Ardi. Walikelas Ardi, Buk Wati jo barek hati manyampaikan,
“ Maaf yo Buk, Ardi banyak nilai nyo nan randah, karano tugas nyo banyak ndak nyo karajoaan, lah bakali kami bina, tapi Ardi ndak juo barubah do, acok ndak masuak sikola, candu pulo marokok. Ndak bisa kami mambantu nilai Ardi do buk, yo maulang Ardi baliak di kelas duo untuk satahun kamuko.”
Amak Ardi manarimo rapor anaknyo jo ati ibo. Anak nan salamoko diharok an ka bisa marubah untuang, kironyo samparono pulo ulah nyo.
Di jalan pulang, amak bakato ka Ardi jo suaro baliau nan alah parau manahan aia mato,
“Ba kok mode ko ang, yuang… Kandak ang babari sadonyo… apo pangana Waang, sampai iko nan waang bari ka den naak, Yo ndak ibo waang ka mande do Nak…”
Ardi manunduak ndak talok manjawek kato-kato amaknyo.
Hari partamo sikolah alah tibo, Ardi indak namuah barangkek ka sikola, Amak alah mambujuak, Tapi Ardi anggan barangkek, dalam hati maraso malu harus maulang di kelas nan samo.
Satahun balalu.
Kawan-kawan Ardi alah tamaik SMA. Zul jo kawan-kawan lain alah bakuliah di kota. Samantaro Ardi? Duduak surang di kadai Tek Mijuh nan tambah reyok. Ndak ado kawan saduduak lai, Ardi mamandang meja jo bangku kosong di kadai, tabayang galak si Zul, cibia si Riyan jo saringik Alan.
“Andai waktu ko bisa diputa baliak…..” kato Ardi dalam hati.
Tapi waktu ndak pernah babaliak, waktu bajalan taruih. Ardi kini duduak tamanuang, takunci di maso lalu, di antaro bisnis rumahan jo saganggam sasalan nan ndak bisa di tabuih. (*)
Sumber gambar: Jaringan Santri. Diakses dari google free access.
