Oleh: Krisna Mulliani (Dinas Pendidikan dan Kebudayaan Kab.Dharmasraya)
Hari lah manunjuak an pukua ampek lewek saparampek, dosen ko sadang talamak bana manjalehan sambia maota galak-galak, jaleh urang di kelas sabalah lah sajak tadi kalua lai, Rina lah rusuah lamo bana kalua sadangkan inyo kapai mambali samba. Hari lah kalam nak turun hujan labek, Rina anak kos dak jauah dari kampusnyo do jadi kalau makan nyo cuma masak nasi tapi samba babali.
“sampai disiko patamuan awak untuak hari iko, salanjuiknyo kalian kumpuan kamih bisuak, ambo dak manarimo alasan apopun kalau kalian dak mangumpuan tugas tu nilai ambo agiah DE”. Kecek baliau.
Sabalun malangkah kalua, si Rina lansuang bagageh kalua baduo jo kawannyo si Ami, kironyo baru kalua kelas lah turun hujan salabek-labeknyo.
“baa caronyo kapai bali samba lai ko Na? Dak talok bajalan disalo-salo ujan ko do”. Kecek si Ami galak-galak rusuah.
”duduak se wak disiko lu Mi malakik ujan taduah, kalau ndak tapaso makan jo karupuak se wak lai, hahaha”. Jawek si Rina sambia takikiak disambuik pulo dek galak si Ami.
Lah ampia satangah jam duduak manungguan ujan taduah ahianyo baranti juo, baserak-serak langkah mahasiswa banyak nan takuruang ujan tadi tu manjauah dari kampusnyo. Nan si Rina jo si Ami lansuang bajalan mambali samba tampaik langganannyo biaso,
Tibo-tibo dakek pasa kuliner ado kudo bendi kababelok tapi si Rina mancaliak ka arah suok, jadi pas tacaliak kakida lansuang tapakiak maambua dek takajuik lah ampia tacium dek kudo tu.
”Amiiiii mati den laaiiiiii,,,,, baa kok aniang-aniang sajo ado kudo tuu, untuang dak didongkaknyo awak baduo”. Kecek si Rina angeh-angehan sambia manjujuik tangan Ami sambia balari ketek.
”lai den caliak tadi tapi ndak tau kalaunyo tibo-tibo babelok Na, den sangko kok luruih se nyo hahahaha”. Jawek si Ami sambia kikiak mancaliak muko Rina nan masih cameh.
Apak-apak tukang ojek jo urang nan dakek situ abih mancaliak ka anak baduo tu dek suaro pakiak si Rina sangaik lantangnyo, tapi untuangnyo lai ndak kanai dek kudo tu do. Ahianyo sampai juo di Ampera Ndak Banamo tu mambali samba ayam lado ijau nan dak pernah bosan tiok hari mamakannyo.
Samba lah dibungkuihan dek si Ade anak buah nan punyo Ampera Tanpa Nama tu, sambia bagarah-garah Rina jo Ami takajuik tibo-tibo dosennyo mambali samba pulo tapi baliau mambali ayam bumbu jo tambunsu untuk dibaok pulang.
”eehh ibuk, bali samba pulo ibuk?”. Tanyo si Rina ka ibuk tu.
”iyo Ayu, ibuk mambali ayam bumbu jo tambunsu untuak anak beko dirumah”. Jawek si ibuk dosen sambia senyum.
”iko si Rina buk ndak Ayu do buk, si Ayu dikos buk”. Kecek si Ami sambia galak.
“acok bana tabaliak-baliak namo nak urang baduo ko dek ibuk, padahal acok manolongan ibuk mambaok buku kakelas lah basabuik an pulo namonyo dek nyo, maaf yo Rina ibuk salah panggia pulo baliak tapi kalian baduo tu yo bana mirip manuruik ibuk lah”. Ibuk dosen maraso basalah tapi sambia galak senek.
“ndak baa do buk, banyak urang mangecek an Na jo Ayu tu mirip buk tapi kami ndak ado badunsanak do buk, hehehe”. Jawek si Rina senyum pepsoden ka ibuk dosen.
“yolah kalua baitu, ibuk ansua dulu dih soalnyo ibuk naiak travel baliak ka Padang, hari lah ampia mugarik pulo”. Kecek ibuk dosen sambia mambayia sambanyo sudah tu lansuang maimbau tukang ojek minta anta ka travel nan bajarak satangah kilo dari pasa kuliner tu.
“Na, sangko den tadi lai kadibayian samba wak dek ibuk tu, sapuluah ribu surang lanjo wak nyo ndak ado baso basi ibuk tu do nak, dasar pilik balapik”. Garutu si Ami sambia mangaluaan pitih disakunyo.
“bialah Mi, kan lah tau pulo awak baa ibuk tu, tapi antah nyo bagageh tadi kapulang takuik ditinggaan dek travel anta iyo bana pilik, eehh ndak buliak wak suuzon tu doh Mi”. jawek Rina mambayia sambanyo tu ka si Ade tadi.
“manga kalian mete-mete se, jan mangambok juo bantuak tu beko tambah sambok jadinyo”. Kecek si Ade manyalo.
“dak ado mangambok doh De lah jaleh kami ko kamek-kamek, kok mangambok ilang lah kamek kami deknyo hahahaa, lah litak paruik sajak tadi lai, ko baru dapek kapasa bali samba tu kok mambuduik jo bantuak lai”. Jawek Ami sambia takekeh.
Ami maambiak pitih siso balanjo ka Ade, sudah tu Rina jo Ami minta tarimo kasih ka Ade lansuang bagageh jalan pulang dek paruik lah karoncongan. (*)
Sumber gambar: website Fekon UMSU id
