Tukang Tulih: Irwan Malin Basa (Dosen UIN Batusangkar, Sumatera Barat)
Sajak saisuak, niniak moyang urang Minang alah tau Caro maukua nan biaso dipakai nyo untuak maukua nan patuik diukua. Tapi sairiang jo kamajuan zaman, ukuran ukuran niniak moyang kito tu lah mulai hilang atau ditinggakan. Baa mangko baitu?
Partamo, ukuran itu mungkin dianggap indak samo. Kaduo, ukuran tu mungkin alun ado standarnyo. Katigo, ukuran tu ado nan bersifat abstrak atau indak jaleh. Kaampek, ukuran tu ado nan bisa ditafsirkan Jo raso sajo. Kalimo, ukuran tu indak diwarihkan atau indak diajakan ka nan mudo mudo.
Tapi, sungguah pun baitu, bialah ambo cubo juo manjalehan babarapo ukuran nan pernah dipakai dek niniak moyang urang Minang. Sabab itu adalah kearifan lokal nan lah ado sajak saisuak.
Nan partamo untuak ukuran panjang. Urang Minang dahulu nyo mamakai jangka atau jengkal (panjang jari kelingking sampai ke ujung ibu jari). Ado Pulo nan mamakai eto atau hasta (panjang dari ujung jari tengah sampai ke siku). Ado juo nan mamakai dapo atau depa (panjang bentang kedua tangan ketika dikembangkan secara lurus di depan dada). Ukuran nan lainnyo adolah Langkah kaki. Misalnyo, bara langkah panjang halaman rumah nyo.
Ado pulo niniak moyang kito mamakai tungkek atau tongkat dari kayu untuak maukua panjang sesuatu. Tungkek tu panjang nyo rato rato sameter sampai sameter duo limo (1 M s/d 1.25 M).
Untuak maukua kadalaman aia di tabek, atau di sawah, atau luak (sumur dangkal) adopulo caronyo. Partamo, samato kaki (tinggi air sampai mata kaki orang dewasa). Kaduo, sapinggang (Kedalaman air sampai batas pinggang orang dewasa). Katigo, sadado (kedalaman air sampai batas dada orang dewasa). kaampek, salutuik (setinggi lutut orang dewasa).
Nan paliang jarang diketahui urang yaitu satapak. Aratinyo, ukuran aia di Banda sawah atau untuak aia di Banda kincia. Ado nan manyabuik satapak tagak Jo satapak luncua. Satapak tagak maksudnyo adolah ditagak an tapak kito. Sedangkan satapak luncua adolah tapak tu dimiriangkan. (Bersambung)
Sumber gambar: laman arsitektur Universitas Lampung. Diakses melalui google free access.
