OLEH: SYAFRIANTO RAJO MUDO, S.Pd,
(Guru SD Negeri 21 Payakumbuh)
Suku Minangkabau lah tangiang ka saluruah palosok Nagari. Minangkabau ulayaik nan tasabuik kayo jo adaiaknyo. Urang Minangkabau batumbuah jo bakambang jo tinggi nilai adaiknyo, apolai bakaikan kakarabatan urang Minangkabau maikek adaik jo katurunan garih mande.
Sacaro turun temurun adaik budayo Minangkabau nan paliang indak kalupo iolah badendang basigurau. Basigurau marupoan adaiak kucindan yang sangaik khas. Basigurau dalam adaik Minangkabau indak lapeh dari pantun nan mambayang jo kato nan malereang.
Basigurau di Ranah Minang juo acok dibaokan dalam bantuak Badendang.
Badendang mampaliekan kaadaan nan iduik suasananyo karano aktifnyo antaro pamain dendang jo panontonnyo.
Dendang di Minangkabau juo nampak dalam kagiatan bamain, balawak jo bacarito nan manunjukan kaakraban, jo kadakekan nan basihoyak basorai. Seni badendang urang Minangkabau talatak dari caro mambaokan lagu nan arih bak cando mamisahkan atah nan jo bareh. Kato-kato dalam badendang bak cando mangayunkan anak nan ka lalok.
Lantunan kato-kato dalam dendang di Minangkabau dibaokan dalam bantuak mandayu marayu sasuai jo irama di bagian wilayah masiang-masiang, sasuai pambagian wilayah bardasar nagari Luhak jo wilayah Rantau.
Raso gundah jo cameh di zaman nan capek barubah, dendang Minangkabaupun nampak-nampaknyo juo mangalami pageseran.
Hal iko dapek kito liek basamo, parmainan dendang Minang indak lai banyak ditampuang dek kabanyakan urang di Ranah Minang. Kito liek, ganarasi palanjuik pamaga adaik dalam nagari lah indak manunjuakan katarampilan untuk bagaluik jo maso kamukonyo malalui dendang dalam dunia palipua ati. Sacaro baransua-ansua ganarasi mudo lah banyak hanyuik jo musik-musik nagari Barat.
Kamunduran-kamunduran yang dialami oleh dendang Ranah Minang ko, hanyo bisa sacaro baransua-ansua dikamukoan baliak bak “mambangkik batang tarandam”. Salah satunyo di wilayah Luak Nan Bunsu, Kota nan lahia dari pemekaran Kota Payakumbuah nan dinamoi.
Pamarintah wali kota lah mancanangan baliak revitalisasi budaya Minangkabau, salah satunyo Badendang satiok hari kamih dan manjadikan mato palajaran BAM sabagai muatan lokal di sakolah-sakolah nan ado, tarutamo janjang SD jo SMP. Mambaliakan sumangaik badendang nan juo paliang rancak malalui sakolah-sakolah ko tantu akan manjadi upoyo manjapuik baliak kakayaan budayo suku bangso Minangkabau. Sasuai jo asa muasanyo dendang Minang ko indak lapeh dri kontek kaadaan urang Minangkabau iduik nan indak lapeh dari pitaruah jo pituah.
Badendang bagi pemerintah kota Payakumbuh indak hanyo sabateh arati bamusik-musik ria, tatapi badendang dapek malahiakan karakter-karakter nan banilai tinggi nan indak lungga dari lawehnyo pargaulan pakambangan zaman. Hal iko sacaro khusus juo manjadi paratian di SD Negeri 21 Payakumbuh, bagi guru-guru ataupun saluruah warga sakolah untuak manjadikan dendang Minang sabagai dayo ikek salero dalam dunia pendidikan malalui kasenian lisan urang Minang.
SD Negeri 21 Payokumbuah, untuak manerapkan dendang ko indak lapeh dari usaho ka murik bia manjadi panikmat dendang. Dek saluruah nan talibaik di SD Negeri 21 Payokumbuah, dendang Minang dilakuan nan mamparatian hubuangan timba baliak kapado murik sacaro bakalanjuikan satiok minggunyo.
Dendang Minang diharokan di SD Negeri 21 Payakumbuh manjadi panampilan nan mariah jo labiah elok mananamkan nilai-nilai kaarifan budayo adaik Minangkabau samanjak dari ketek. Rancaknyo dendang Minang katiko dibaokan di tangah galanggang nan rami, tantunyo iko nan mambuek sero apobilo batamunyo kahandak tukang dendang nan bakaba jo panonton nan mandanga sambia manarimo garinyiaknyo.
Garinyiak dendang Minang ko lah nan mambari bakeh ka dalam raso. Raso ko pulolah nan mambuek dendang Minang indak kalupo. Aratinyo, garinyiak dari dendang Minang indak lapeh dari isi dendang nan dimainkan. Rato-rato dendang Minang indak lapeh dari pasan nan batuah, karano dendang Minang masih pakek jo nilai-nilai adaik nan lah batimbang jo raso, raso nan tumbuah manjadi parangai, parangai nan elok kajadi pamanenan iduik.
Dendang Minangkabau labiah banyak barisi ajakan nan manjalani iduiak labiah maadok untuak tau nan jo agak. Salain itu, mambaokan dendang nan basohoyak basiolai juo mambarikan khas tasandiri dalam mahilangan raso januah bagi panonton atau pandanganyo. Jadi, untuak mampatahankan dendang Minang bia indak puda ataupun ilang paralu sakironyo urang Minang tarutamo di lingkungan sakolah untuk aktif maagiah nilai dendang Minang sabagai budayo nan dijunjuang tinggi, bia ditangah ujan nan labek maupun ditangah paneh nan badangkang, labiah-labiah di SD Negeri 21 Payakumbuah manyadari bana dendang Minangkabau sabagai alaik untuk manjago kasaimbangan antaro nilai palajaran umum jo palajaran nan diambiak dari kaarifan lokal. (*)
