Oleh: Tika Dewi Sari, S.Pd. (Guru SMPN 17 Sijunjung)
Kato badunsana ko hampia tiok hari awak dangga, dalam bacarito baiak jo amak, jo kawan dan jo yang lain gai. Di tampek karajo, di lapau, kato Badunsanak ko acok tasabuik. Ambo sandiri acok diagiah nasehat dek amak ambo, elok –elok jo dunsanak. Isuak awak akan ado masonyo paralu jo dunsanak.
Iyo bana batuah, buliah dicaliak pulo di tampek awak tingga, baralek paralu jo dunsanak, maningga paralu jo dunsanak dan yang lain pulo bagai. Idak kan bisa jauh jo kato dunsanak. Tapi ambo ado pernah maraso ambo indak ado punyo dunsanak.
Ambo sandiri batanyo apo lai ado juo Badunsanak? Karano ambo surang pernah marasokan parasaan yang sarupo itu.
Dimano ambo maraso idak ado yang dunsanak ma acuahkan rasonyo do. Apo lai disaat ambo sangaik mambutuhkan tampek basanda. Makasuik ambo tampek basanda ko bukan dek karano ambo panek tu paralu tampek duduk basanda, Indak sarupo itu . tapi tampek mangadu labiah tapeknyo.
Takadang awak yang capek bana ma ambiak kasimpulan, jo capek bana manila urang. Hiduik badunsanak ko paralu awak jago, sampai bilo – bilo. Takadang iyo ado pulo yang dunsanak nan indak bisa tampek ba iyo, makasuik ambo baiyo ko nan dak bisa babagia raso sakik.
Sabananyo banyak pulo bantuak dunsanak ko. Tapi ambo sarankan ka dunsanak ambo yang mambaco ko jago lah raso badunsanak ko, apolai jo dunsanak yang sa pak jo sa induak. Bia ado acok maraso idak diacuahkan dek dunsanak atau ta ibo ati dek talompek kato dak usah di masuakan ka ati.
Sabab awak ko pasti paralu jo dunsanak awak baiak sanang apolai sadang kasusahan. Dunsanak ambo kasadonyo, pasti ado danga kato – kato, kok pitih indak badunsanak. Kalau di inok –inokan kato tu yo agak padiah tapi baliak ka yang tadi bakpo ka bakpo awak paralu dunsanak.
Piti yang dak punyo dunsanak, awak iduik paralu jo dunsanak. Baiak awak sadang sanang kini, tapi di suatu maso akan ado paralu jo dunsanak awak sandiri, walaupun dunsanak awak tagalong indak bapunyo, indak bapiti, indak barado.
Apobilo awak badunsanak rancak jo baelok – elok. Itu lah jadi sitawa jo sidingin dek amak jo apak awak, aratinyo lai pandai saliang babimbiang meski alah punyo iduik sorang – sorang bagai. Oi dunsanak ambo ka sadonyo, ambo manuliah sarupo iko dek karano ambo sangaik mangharagoik dunsanak ambo.
Ambo maraso banyak babuek salah ka dunsanak ambo, alum sampai ambo ma mintak maaf jo bajawek tangan ka dunsanak ambo yang lah ambo sakiti ati nyo, baiak sacaro langsuang ataupun tingkah ambo. Mako dari itu ambo tau iduik ko untuk ka mati, Ambo sabagai manusia biaso nan banyak babuek salah, bari lah ambo maaf satulus ati dek dunsanak ambo kasadonyo. (*)
Sumber gambar: ruangguru.
