Urang tuo tuo awak di Minangkabau sajak saisuak lah banyak mambuek alat alat nan paguno untuak macam macam kaparaluan hiduiknyo. Ado alat alat batani, alat kadapua atau mamasak, alat panangkok ikan, alat tanun dan alat alat lainnyo nan mamakai unsur teknologi lokal sarupo kincia, garobak, dll. Alat alat itu dibuek dari kayu, rotan, batuang dan bahan bahan lain nan ado di sekitar lingkungannyo.
Ado nan lah agak jarang nampak yaitu “Laka” atau ado nan manyabuik “Senggan.” Laka tu dibuek dari lidi karambia dan ado pulo dari lidi anau. Ado pulo nan mambuek dari rotan ketek. Caronyo dianyam atau dijalin atau dirajuik.
Ukuran laka tagantuang Jo kagunoannyo. Ado laka untuak malatak an pariuak. Adopulo Laka untuak ayam batalua, maaram sampai manateh. Ado laka untuak palatak an dagiang nan baru dipotoang.
Kini laka mungkin “salah guno” bagi sabagian urang. Laka banyak dipakai untuak malatak an buah buahan bilo ado acara acara tamu VIP. Dek tamu nan hadir indak pulo paduli atau indak tau guno laka tu, nyo sosoh juo buah nan talatak di dalam Laka tu. Nan paralu dek urang kini rancak dicaliak.
Adopulo laka digunokan untuak hiasan dindiang. Laka lah manjadi barang langka nan memiliki nilai artistik nan tinggi. Tapi nan paralu Kito sadari bahwa laka adolah warisan budaya kito sajak dulu. (IMB).
